Shillong, Nohprah 18 : Ka Maitshaphrang Khasi League T20 Cricket Tournament Committee jong ka KSU ka pynbna ba sa shisien kan pynlong biang ïa ka Maitshaphrang Khasi Cricket League na ka bynta ka samoi 2022-2023.
Ka jingthmu ban pynlong ïa katei ka Tournament ka long ban kyntiew ïa ka sap ïalehkai cricket ha ki samla Khasi ha kylleng ka Bri U Hynñiewtrep namar ka Cricket ka dei ruh ka jingïalehkai kaba pynim jakpoh bha ïa ki riew ieid sports napdeng baroh ki jingïalehkai ba don ha India. Kum ban shu ai jingtip, ki nongïalehkai kiba ïoh ban mih khmat na kano kano ka jylla ha ka Ranji Trophy ki kamai la kumno kumno 30-35 lak ha ka shi samoi.
Kumta ka KSU kam kwah ïa katei ka 30 ne 35 lak ban shu sepei sha ka pla ki bym dei ki trai jylla hynrei ka kwah ban poi sha ka jaka ba don hok, kata sha ki samla Khasi kiba tbit bad thrang shisha ban ïalehkai Cricket.
Kum ban pynkynmaw hangne, ka KSU ka la dep pynïaid ïa kane ka tournament ha ka samoi 2021-2022 ha kaba 32 tylli ki kynhun na baroh 7 tylli ki district ka Ri Khasi ki la wan ïahim bynta. Ha katei ka jingïalehkai ka Rangkynsai CC ka la ïoh rah ïa ka nam lahduh bad ka Lumshyiap CC ka la wan ba ar. Ha kane ka lympung kaba mynta ka KSU kan sdang ban sam noh ïa ki form ha kaba lah ban ïoh ban download na ka website ka seng www.khasistudentsunion.com bad ïa ki jingtip kynthup ïa ki kyndon la batai bniah ha katei ka form.
