Jowai, Naitung 15: Ka Education Sub-Committee ka Warjaiñtia Students’ Union (WjSU) kala pynbna paidbah ba kan pynlong ïa ka Follow-Up Examination 2025 jong ki Top-20 haka First Warjaiñtia Scholarship Examination 2024 kaba dang shu dep pynlong mynshem snem 14th December 2024.
Ïa kane ka Follow Up Examination 2025 yn pynlong ha Riwar Jaiñtia CoG Secondary School, Ladjaplem, Amlarem Civil Sub-division ha ka 26 tarik u Naitung, 2025 bad ka por jong ka Exam ka long naduh 9:00 am haduh 12 baje mynsngi.
La kyntu ïa ki khynnah skul kiba poi sha ka Top-20 jong ka First Warjaiñtia Scholarship Examination 2024 kiba don 25 ngut na ka Section-I, 20 ngut na ka Section-II bad 20 ngut na ka Section-III kin long kiba la khreh ban shim bynta ïa kane ka kabu ksiar kabu rupa ban ïaleh bha ha kane ka Follow Up Examination kiba pass bha 5 ngut na kawei ka SectionI, II, III, ka Education Sub Committee ka seng kan ai Scholarship 1000 tyngka uwei na ka bynta 12 bnai kum shi bynta ban ïarap tynrong lang ïa ka jinglut jingsep haka pule puthi ki khynnah kiba minot bad kiba tip la ka kamram ban poi sha ka thong jong ka jingim jong ki, khamtam kiba wan na ki long ïing kiba duk ba rangli.
La kyntu ïa ki nonghikai napoh ka Warjaiñtia Amlarem Civil Sub-Division Amlarem kiba don ki khynnah ba pass bha haka First Warjaiñtia Scholarship Examination-2024 kiba poi ha ka Top-20 position kin shim ïa kane ka kyrwoh ban guide ïa ki khynnah skul jong ki ba kin jop ïa u maw jam jong ka lynti ha ka pule puthi jong ki.
Ki khynnah skul kiba don ha ka thup Top-20 na baroh 3 Sections kin hap rah bad pyni ïa ka Current School Identify Card shwa ba kin rung ha kamra thoh exam ha katei ka sngi thoh exam ba la dep pynbeit.
Nalor ka Written Examination ka Education Sub-Committee ka la pynkhreh ïa ki riew shemphang ban leh ïa ka personal interview ïa kine ki khynnah skul, kan long kum shi bynta ba ki khynnah skul kin ïoh confidence ha ki personal interview ki ban dang wan ha ka jingim pule jong ki.
Ka personal interview kan long kumne na ka bynta ka Section-I haka por 1:00 pm, Section-II haka por 1:30 pm bad ka Section-III haka por 2:00 pm.
Lyngba kane ka exam buddien ïa ki toppers ka First Warjaiñtia Scholarship Examination 2024 kan pynskhem shuh shuh ïa ka jingshemphang bad pynproh jabieng ïalade ha ka liang ka jingstad kot bad jingstad pyrthei kaba donkam ha ka jingim pule jong ki.
Na ka liang ka Education Sub Committee kala pynbna ban kan pynlong ïaka Scholarship Distribution Ceremony, ban pynkup burom ïa ki samla kiba na ka thaiñ Warjaiñtia kiba dang shu dep cleared ïa ka Meghalaya Civil Service Examination dang shen ba la pynlong da ka Meghalaya Public Service Commission. Kane ka program kan long haka 16 August, 2025 ha Riwar Jaiñtia CoG Secondary School, Ladjaplem, Amlarem Civil Sub-division ha ka por 10 baje mynstep.
Ha kane ka Scholarship Distribution cum Felicitation Ceremony yn wan ban pynshngaiñ da ka kongsan kong Dolly Khonglah Secretary Meghalaya International Exports of Chambers bad iba dei iwei na ki Riew pawnam ka Warjaiñtia bad ka jylla Meghalaya hi baroh kawei.
La khot sngewbha ïa baroh ban wan sakhi ïa kane ka event kum shi bynta ban ai mynsiem ïa ki nongïalam bad ki dkhot ka seng kiba trei shitrhem ban kyntiew ïa ka pule puthi hapoh ka thaiñ Warjaiñtia. La pynkut ka kyrwoh na ka samla G.A. Pohthmi kaba dei ka Education Secretary ka WjSU Central Body, Amlarem.
