Mawkyrwat, Nailar 08: Ka South West Khasi Hills District Swimming Association kan sa pynlong ïa ka 7th Annual Swimming Competition, 2025 kaba ki ju pynlong borabor ha ka 15 tarik u Nailar, 2025 kaba long ruh ka sngi ba kyrpang, ‘ka sngi ïoh laitluid’ ne ‘Independence Day’ jong ka Ri India bad ïa kane ka programme sdang ha ka por 9 baje mynstep ha Phot Mawpon, Wah Sala kaba don ha South West Khasi Hills District.
Ïa kane ka jingïakop yn pynlong kum ka jingïalehkai kaba manla ka por ne manla u snem lyngba ka jingïarap na ka ophis jong u Deputy Commissioner bad ka ophis jong u District Sports Officer, South West Khasi Hills District.
Ha kane ka lympung kin don ïa ki bynta kum ka Senior Men & Women, kaba kynthup ha ka 50 metre freestyle, 50 metres backstroke, 50 meters butterfly, 50 metres breaststroke, kumjuh ruh na ka bynta ki khynnah shynrang bad kynthei ne Junior Boys bad Girls.
Kum ka Association, ka la pynbeit ba uwei uwei u nongiashim bynta un nym lah ban iashimbynta palat 3 tylli ki bynta, bad ka bai rung kan long 20 tyngka kawei ka bynta bad sa kawei ruh ba mynta ka kynti ki la pynbeit ba tang ki nongjngi um napoh South West Khasi Hills District kin ioh ban iashimbynta ha kane ka jingïakop bad kane ka jingthmu ka long ban kyntiew ia ki sap ki phong jong ki samla napoh ka District.
Kumta la kyrpad ia ki nongiashimbynta ba kin wan ia kynduh kham kloi bad ki nongkitkam ka South West Khasi Hills District Swimming Association khnang ba kan pynsuk ban pynbeit ia ka program.
