Yn pynlong ka ophis DCIC ïa ka 10th District Level Industrial Exhibition 2026 ha Mawkyrwat

Mawkyrwat, Rymphang 26: Ka ophis jong ka District Commerce & Industries Centre (DCIC), South West Khasi Hills District, kan sa pynlong ïa ka 10th District Level Industrial Exhibition 2026 ha madan jong ka Balang Mawkyrwat Hills Presbyterian, kaba don hajan ka Mawkyrwat Community Hall, South West Khasi Hills District.
Ïa kane ka jingpyni nam ïa ki mar ki mata ne ka exhibition yn pynlong ha ka 10 bad 11 tarik u Lber, 2026.
Ka jingthmu ba kongsan jong kane ka exhibition ka long ban pynshlur bad kyrshan ïa ki nongseng kam lajong da kaba ai ïa ki ka lad ban pyni bad pynïaid ïew ïa ki mar ki mata bad ki jingshakri jong ki.
Kane ka jingïalang kan pynlah ruh ïa ki nongïashimbynta ban ïakynduh bad ki nongthied kiba kwah ban thied, da kaba kyntiew ïa ki lad kamai ha ka lawei bad kan kyntiew ïa ka jingroi ka par.