Mawkyrwat, ‘Nailur, 11: Ki shibynta jong ka jingrakhe ïa ka World Rabies Day 2025 na ka liang ka Meghalaya Veterinary Services Association (MVSA), West Khasi Hills District Unit kan sa pynlong ïa ka Anti-Rabies Vaccination Drive na ka bynta ki ksew bad ki miaw ha baroh ki Veterinary Dispensary hapoh ka South West Khasi Hills District.
Lah ban kdew ba ïa katei ka porkram kan long ha ryngkat ka jingïatreilang bad ka ophis u District Animal Husbandry & Veterinary Officer bad u Sub-Divisional Animal Husbandry & Veterinary Officer.
Namarkata, la pyntip paidbah ba ka jingai tika ïa ki ksew bad ki miaw kan long naduh ka 22 tarik haduh ka 26 tarik, u ‘Nailur, 2025 manla ka sngi naduh 10 baje mynstep haduh 2 baje nohphai sngi.
Kane ka jingpynlong Vaccination Drive ka dei kum shibynta jong ka World Rabies Day 2025, ban ai jingtip paidbah bad ban ïada na ka jingpang rabies ha ka imlang sahlang.
