Nongpoh, Nohprah 07: Ka kynhun Mawbyrsiew kawei naki kynhun ki samla naka thaiñ Umsning kala rai ban pynlong da ka ‘1st Miss Umsning Constituency Cum Mini Fete’ ha Umsning Nongthymmai da ka jingthmu ban pynmih pisa ïaka shnong bad kumjuh ka sports club ha katei ka shnong kaba don shibun ki jingthmu ban ai ka jingshakri na ka bynta ban kyntiew ïa ka imalang ka sahlang.
Haba kren sha ki lad pathai khubor mynta ka sngi ha Umsning ,u Samla Binestar Kylla haka jingdonlang ki nongïalam katei ka kynhun naduh u Samla Bregie Sun Organising Secretary, Samla P Dkhar Working President bad u Samla George Dkhar, u la ong ba ïa katei ka tamasa yn pynlong haka 9 bad 10 tarik mynta u bnai ha Umsning Nongthymmai, bad ha katei ka jingïakop thei bhabriew yn shah tang ïaki nongshong shnong jong ka Umsning Constituency bad ka nongjop kan ioh rah ïaka song pisa kaba 20 hajar bad ioh ruh ban leit shim bynta ei sha ka Meghalaya Face 2023 ban sa long ha nongbah Shillong, nalor kiwei kiwei ki khusnam.
Ki nongïalam kila pyntip ruh ba kin don shibun ki jingpynbyrngia naduh ka ka jingïakop pynri riam ki heprit kiba hapoh 10 snem ka rta, slow bicycle race, mawpoint, penalty shootout, ki nongput nongtem naduh ka kynhun Colors, Jlawdohtir, DJ Cube DJ Meban bad kiwei kiwei ki ban pynshong shit ha katei ka sngi.
Namarkata naka liang ki nongïalam katei ka kynhun kila kyrpad ïaki paidbah ban wan sakhi ha katei ka sngi khnang ba katei ka program kan long kaba ïaid beit bad seisoh bad kaba long ruh shi bynta ka rynsan ban sei madan ïa ki sap ki phong ki khun samla kiba don hapoh ka Umsning Constituency.
