Yn pynlong ka Financial Services ïa ka District-Level Camp halor ka DEA Fund ha EKH

Shillong, Naiwieng 12 : Ka Tnat kam pla tyngka jong ka sorkar India, hapoh ka “Your Money, Your Rights” ka kam ai jingtip ïa ki paidbah kaba kyrpang, kan pynlong ïa ka jingai jingtip bad ka jingai jingïarap halor ka Depositor Education and Awareness Fund (DEA Fund) ha ka 14 tarik Naiwieng ha East Khasi Hills district.
Kane ka sienjam ka thmu ban pynkup bor ïa ki nongshong shnong da kaba hikai ïa ki shaphang ka hok kaba ïadei bad ka pisa jong ki bad ban ïarap ïa ki ban ïoh biang ïa ki jingkynshew pisa jong ki ki bym la shim haduh mynta, ki jingdawa insurance, ki bhah, ki share bad ki mutual fund.
Ïa kane ka prokram la pyntreikam ha baroh kawei ka jylla Meghalaya hapoh ka jingïalam jong u District Collector bad ka jingpeit jong ka State Level Bankers’ Committee (SLBC), Meghalaya ryngkat ka jingïatrei lang da ka Lead Bank jong man la ki District. Ha kane ka prokram ai jingpynshai yn wan ïashim bynta da baroh ki bank, ki kompeni insurance, ki tnad bai bam tymmen, ka Securities and Exchange Board of India (SEBI) bad ka Investor Education and Protection Fund (IEPF).
Ha East Khasi Hills ïa kane ka camp yn pynlong naduh ka por 11 baje mynstep ha ka Conference Room jong ka DC Office hapoh ka jingpeit jong u District Collector bad u Lead District Manager. Yn buh ïa ki jaka ai jingïarap ban ïarap ïa ki nongshong shnong ha kaba pynthymmai ïa ka KYC, ka jingpyndap ïa ki phormjingdawa bad ka jingpynshisha ïa ki kot ki sla ban pynsuk ïa ka rukom dawa ïa ki jingdon jingem kiba dei hok jong ki.
Ka SLBC-Meghalaya, ka la kyntu ïa ki nongshong shnong ban ïashim bynta shitrhem, bad ka la pynskhem biang ïa ka jingkular jong ka ban kyntiew ïa ka jingnang jingstad ha ka liang ka pisa tyngka bad ban plié lad ban ïoh suk ïa ki jingmyntoi pisa kiba dei hok ha kylleng ki distrik jong ka jylla. Hapoh kane ka kam, yn pynlong ïa ki katto katne tylli kum kine ki camp ha ki district bapher bapher jong ka jylla Meghalaya haduh ka 31 tarik Nohprah 2025.