Nongpoh, Naiwieng 22 : Ban pynpaw paidbah ne ka jingthrang ban pynlong kum kata ka jaka jngohkai pyrthei da ka jingwan poi kita ki sim Amur Falcon ha ka thain Tyrso bad Umtngam ha Ri Bhoi District bad ruh kiwei kiwei ki jaka ba paw ba la pynbuh pynsad da ka mei mariang, ka Brup Hang Lang Tourism Promoting Society ha ryngkat ka jingïatrei lang ka 7 Huts Production ki la pynbna paidbahba kin sa pynlong ïa ka tamasa Amur Falcon lane ka tamasa ïa ka jingwanpoi kita ki sim Amur Falcon kiba ju wan da ka kynhun man la u snem ha ka thain Tyrso, Umru bad Umtngam. Ki nongïalam katei ka Society mynta ka sngi ki la pynbna paidbah ba kane ka Tamasa Amur Falcon kan long ha ka 5 bad 6 tarik u Nohprah 2025 hapoh ka Shnong Umtngam ha Ri Bhoi District.
Kumba la pynpaw da ki nongïalam kane ka Society ba kynthup ïa u President u Bah Daminot Sylliang bad u Bah Aibansuklang Nongrum kum u Secretary, ka thong kaba ki angnud ban pynlong ïa kane ka Amur Falcon Festival ka long ban pynpaw nam ïa katei ka thain Tyrso bad Umtngam kum kata ka jaka jngohkai pyrthei bad khamtam ban dang pynpaw pyrthei ïa ki jaka ba la buh la sat da ka mei mariang kiba ym pat tip sha ka pyrthei.
Ki la ong ruh nalor ka jingpaw nam jong ka jingwan kita ki sim Amur Falcon kaba ki ju wan buhai shnong man la u snem ha bnai Naiwieng haduh u Nohprah ba la kot da ki lak tylli, ka Society ka kwah ruh ban pynpaw ïa kiba bun ki jaka ba itynnad ha katei ka thain bad kaba ym pat tip ki paidbah ha ka jylla ne ka ri.
Ki la ong ruh ha katei ka tamasa ba ar sngi kin don shibun ki prokram ïa kop bad kynthup ruh ka prokram kyrpang ban hikai halor ka jingdonkam ban sngewthuh kumno ban ïada ïa ka mariang bad ïa ki mrad kiba don hapoh ka mei mariang, ba bun ki la duh jaid na ka jingdusmon ki riew shi kabu.
Shuh shuh, ki la ïathuh ruh ha katei ka tamasa ba ar sngi kin don ki jingïakop bapher bapher kum ka put ka tem, ka rwai ka siaw, ka jingïakop niah lieng, ka jingïakop niah Cycle bad kin don ruh ki Band ba paw bad kynthup ki local Band bad ki DJ ki ban pynshongshit ha kane ka tamsa, ha kaba kin don ruh ki khusnam pisa naka bynta kito ki nongjop. Ki la khot la wer ïa baroh ki paidbah ka jylla ban wan ban sakhi bad ruh ban mad ïa katei ka tamasa kaba ki la pynkhreh shaid shaid khamtam kan don ruh ka jingbam tynrai bapher bapher ha kitei ki ar sngi.
