Shillong, Nailar : Ka Seng MeECL Progressive Workers’ Union (MePWU) ha ka general meeting kaba la long ha ka 20.08.2022, ka la shim ïa ka rai ban pynlong da ki prokram jingïakhih ba jar jar da kaba deng da ki badge rong ïong ha baroh ki ophis treikam jong ka MeECL naduh ka 29 haduh ka 31 tarik mynta u bnai Nailar 2022, bad ruh ban pynlong da ka jingïakhih shong kyllaiñ mungor khlem da pynthut ha kaba ïadei bad ki kam sam bording bad ki jingtreikam ba man ka sngi jong ki ophis naduh ka 05.09.2022 haduh ka 16.09.2022.
Halor kane ka bynta ka Seng ka la phah ruh da ka jingthoh sha u Chairman Cum Managing Director, Meghalaya Energy Corporation Limited, Lumjingshai, Shillong.
Na ka liang ka Seng ha u kyrwoh lyngba ka I Kong A. Hynniewta, General Secretary ka la pynpaw ba ka Seng ka la dep ban phah artylli ki shithi kiba kyrpad na ka bynta ban pynlong ka jingïakren ha ka 09.03.2022 bad ha ka 13.04.2022, hynrei haduh mynta kam shym la don kano kano ka jubab na ka liang ka ophis jong u.
Ka Seng ka pyntip ruh sha u Chairman ba ki la ïoh ruh ban ïakynduh ia u Myntri ka tnat bording ka sorkar jylla ha ka 25.04.2022, bad aiti ruh ïa ka Memorandum jong ka Seng, hynrei kim shym la ïoh satia ïa ka jubab ka ban pynhun.
Nalor kata, ka la ong ruh ba ha ka 11.05.2022, ki nongïalam ka Seng kila pyrshang ruh ban leit ïakynduh ïa ka ophis jong u Myntri Rangbah ka jylla bad aiti ruh ïa ka shithi kyrpad na ka bynta ban pynlong ka jingïakren, hynrei haduh mynta kam shym la don kano kano ka jubab na ka liang u Myntri Rangbah.
Kumta ruh halor kane ka nongrim na ka liang ka seng kam banse ban shim da ki sienjam kiba kham tyngeh da kaba khot pynlong da ka jingïakhih.
Ka Seng ka pynkynmaw ba kine ki jingdawa kiba la slem bha ka long na ka bynta ban thaw ïa ka polisi treikam ban ithuh noh (regularise) mardor ïa ki nongtrei kontrak bad nongtrei bylla sngi kiba la rim.
Nalor kata kila kyrpad ruh ban pyllait noh mardor ïa ka Arrear kaba dang sahteng jong ki, kata naduh u bnai Risaw 2018 haduh u Rymphang 2019 ïa kaba ym pat shym la pyllait kat haduh mynta.
