Amlarem, K’Lyngkot 19: Ka Ophis jong u Sub-Divisional Officer (Election), Amlarem Sub-Division, kan pynlong ïa ka jingïamareh “Run for Democracy” haka 23 tarik Kyllalyngkot 2026 haka por 6 baje mynstep, kum shi bynta ban rakhe ïaka 16th National Voters’ Day Celebration.
Kane ka prokram ka thmu ban kyntiew ïa ka jingïatip paidbah shaphang ka jingdonkam jong ka jingïashim bynta paidbah haka synshar paidbah (democracy) bad ban pynshlur ïa ki nongshong shnong, khamtam ïa ki samla ba kin shim bynta shitrhem haka jingthep vote bad ha ka jingïaid paidbah.
Ka jingïamareh kan sdang na ka khyrdop ba hakhmat jong ka SDO (Civil) Office, Amlarem. Ki nongshim bynta kin dei tang ki nongshong shnong bad ki nongthep vote jong ka 7–Amlarem (ST) Assembly Constituency bad yn pdiang tang 70 ngut ki nongshim bynta, da ka jingshim register ha katei hi ka jaka (first come, first served basis).
Na bynta ki Junior bad Senior category (shynrang bad kynthei), ka lynti jingïa mareh kan long na SDO (Civil) Office sha Ladjaplem bad phai biang sha SDO Office. Na bynta ka Sub-Junior category (ki khynnah hapoh 14 snem), ka lynti kan long na SDO (Civil) Office sha ka Ophis jong u Block Development Officer, Amlarem C&RD Block bad phai biang sha SDO Office.
La pyntip ba yn sam khusnam da ka pisa sha ki nongjop bad kiba wan ba ar (runners-up) ha manla ki category.
Ka Ophis jong u Sub-Divisional Officer (Election), Amlarem Sub-Division, ka khot ïa baroh ki nongshong shnong ban wan ïashim bynta ha kane ka prokram, khnang ban pynkhlaiñ ïa ka jingïatip paidbah shaphang ka hok jingïathep vote ha kane ka thaiñ.
