Shillong, Nailar, 09: Ka seng ki nongshna phlim ha ka jylla hapoh ka shatri jong Meghalaya Film Makers Association (MeFilma) ryngkat ka jingïatrei lang bad ka Meghalaya Tourism ha ka sngi Nyngkong ka la pynbna ban pynlong ïa ka International Meghalaya Film Festival ha u bnai Nohprah 2022.
Ban pyntyllun ïa kane ka prokram ka MeFilma ka la wer ruh ïa ki riew donsap jong ka jylla, ha ka jingïakhun jingïakop ban shna ïa ka shap(logo) bad ka Intro Video kaba ïadei dur bad kane ka prokram.
U President ka MeFilma U Bah Commander Shangpliang haba kren sha ki lad pathai khubor u la pynshai ba ka shap bad ka Intro Video kidei ban kit ïa ka jingmut katkum ka prokram kata ka long Meghalaya Tourism, Meghalaya Age bad Arts & Culture. Ha kaba ïadei bad ka video ruh kadei ban ïahap dur kumjuh bad kaba jrong tang 40 sec.
U la ong ba ïa ki nongjop ha ka jingshna ïa ka shap kin ïoh ran ia ka khusnam da ka song pisa ba 10,000/-Tyngka bad ïa u nongjop ha ka jingshna ïa ka video pat 20,000/- Tyngka. Lah ban phah ïa ka shap bad ka video sha u Mobile Number 9774032252 ha shuwa ka 16 tarik u Nailar.
U la ong ba kane kadei ka sien kaba nyngkong ha kaba yn pyni paidbah ïa ki film Khasi ha katei ka festival, bad yn pyni ruh ïa kiwei ki jait phlim na bar ri.
