Yn pynlait ka sorkar na ka jingpynlip bording ha ki hospital pyntip ruh ba kiew ka um ha Umïam da 10 phut

Shillong, Jymmang 14: Ka High Court (HC) of Meghalaya ha ka sngi Balang ka la bthah ïa ka sorkar jylla ba kan pynlait ïa ki hospital na ka jingshah ktah na ka jingpynlip bording.
Haba shim bishar ïa ka PIL ba la ujor da u Flemming B Marak halor ka jingpynlip bording ka sorkar jylla, ka kasari jong ki arngut ki nongbishar ba kynthup ïa u Chief Justice ka HC u Justice Sanjib Banerjee bad u Justice W Diengdoh ka kasari ka la bthah ba ka sorkar jylla ka dei ban pynthikna ba ki hospital kin ym shah ktah bad lada jia ba ka don ka jingpynlip bording ruh ka sorkar ka dei ban pynthikna ba ka dei ban don ki lyntip ban pynap ban lait na ka jingshah ktah kum ka jingpynbiang ïa ki diesel generator.
Ka sorkar jylla ka la pyntip ruh sha ka kashari ba ka sorkar ka pyrshang ban pylait na ki jingktah ka jingpynlip bording ha ki jaka sumar hynrei ka ong ba kine ki hospital ki dei ban ring bording da ka high tension feeder lines. Ka la pyntip ruh ba ka North Eastern Indira Gandhi Regional Institute of Health and Medical Sciences kam shah ktah na ka jingpynlip bording katba ka Civil Hospital, Shillong pat ka shah ktah namar ka jingbym don ka high tension feeder line ha baroh kawei ka hospital.
Ka kashari ka la bthah ruh ba nalor ka jingpynbiang bording ha ki jaka sumar ka sorkar ka dei ban don ruh ka plan B ha kaba ïadei bad ka jingpynbiang bording.
Shuh shuh ka sorkar ka la pyntip ba ka jingther u slap ha kine ki khyndiat sngi ba la leit ka pynlong ïa ka jaka pynlang um ha Umïam ban kiew da 10 phut kaba wanrah pat ïa ka lad ban pynmih bording kham bun ym kum ha kine ki khyndait sngi kiba la leit bad kumjuh ka la pyntip ruh ba kan thied bording na ka National Thermal Power Corporation bad kiwei ki kompeni pynmih bording ban pyndap ïa ka jingduna bording ha ka jylla.
Lah ban sakhi ba ha kane ka sien shong bishar ba mynta ruh ka don ka jinglip kynsan ka bording katba ka kashari shim bishar ha kaba u CJ la ïohsngew ba u la kylli, ‘hato kane ka dei ka kam biria,’ namar ha ka sien shong bisar ba nyngkong eh ruh ka don ka jinglip bording katba u CJ u dang pynmih ïa ka hukum,.
Na ka liang ka kashari ka la bthah ïa ka sorkar jylla ba kan phah ïa ka kaiphot halor kane ka jingpynlip bording shuwa ban shim bishar biang kaban long ha ka 5 tarik u Naitung.