Shillong, Jylliew 08 : Ka tnad Forest and Environment jong ka sorkar jylla ka la pynkhreh mynta ban pynkynriah noh sha ka jaka thymmai ïa baroh ki mrad bad ki sim kiba don ha Phan Nonglait Park kaba ju tip baroh shi katta kum ka Lady Hydari Park, Shillong.
Haba pyntip ïa kane, u Myntri ka tnad Forest, James K Sangma u la ong ba ka jingtrei mynta ïa katei ka jaka ri mrad ba thymmai (state zoo) kaba don ha Umrew, Ri Bhoi District ka la ïaid shakhmat mynta.
“Ngi kyrmen ba ngin sa ïoh ban plie noh shen ïa ka namar ka jingpyntrei ka la ïaid stet bha. Ngi kwah ruh ban pynkynriah lut noh ïa baroh ki mrad bad ki sim kiba don hangtei sha ka jaka sah kaba thymmai na katei ka jaka ba don mynta,” la bynrap biang u Myntri.
U Myntri u ong ruh ba ka jingbuh ïa ki mrad ha katei ka park kaba don baroh shi katta kadei kaba rit bad kumta ka long kaba isynei ïa ki ban ieh sah hangtei hynrei namar baroh shi katta ba kim don lad kim banse ban ieh kumto.
Katkum ka jingong jong u, na ka liang ka sorkar jylla ruh ka kwah ban pyndep kham kloi noh ïa katei ka state zoo khnang ba kan ym shimpor shuh ban pynkynriah noh ïa ki nangtei.
Ha kawei pat ka liang u Myntri u la ong ruh ba tad haduh mynta hi kim don kano kano ka jingthmu ban wanrah kham bun shuh shuh ki mrad sha katei ka jaka ri kaba thymmai lait noh na kito kiba dei na ka Phan Nonglait Park.
Shuh shuh u la ong ruh ba hadien ba la dep ban pynkynriah lut ïa ki mrad na katei ka park, ka sorkar kan sa phah pynpra lut ïa kitei ki jaka baroh khnang ba yn dup lah pat ban pynwandur ïa ka kum ka jaka ïaid kai ne shongkai pyngad jong ki paidbah.
