Mawkyrwat, ‘Nailur, 06: Ka Ranikor Constituency Development Committee (RCDC) lyngba ka Education Cell kan sa ïoh ban pynkup burom na ka bynta ki khynnah skul bad ki samla pule jong ka dong ka thaiñ Ranikor bad ka dap ruh da ka jingsngewkhia kaba khraw ha kaba ïa dei bad ka pule puthi na ka bynta jong ki hapoh ka dong ka ka thaiñ Ranikor namar ba ha kine ki ar snem ka la don ka jingthud na u Covid-19.
Namarkata, na ka liang u bah Pius Marwein MLA/ MDC ka Ranikor u ba dei ruh kum u Chairman jong ka RCDC ha ryngkat bad ki nongkitkam jong ka RCDC ki la don ka jingïapyrkhat kaba kyrpang na ka bynta ki khynnah bad ki samla pule lyngba ka Education Cell kumno ban kyntiew bad ai mynsiem ban pynshlur ïa ki samla jong ka thaiñ Ranikor ha kaba ka khot aplikeshon na ka bynta ban ai khusnam ïa ki samla kiba pass ïa ka SSLC/ HSLC/HSSLC/Diploma Course, Bachelor Degree, Master Degree, Doctors bad kiwei de ki kyrdan pule naduh u snem 2020 haduh 2022, kata na ka bynta ha ka klas SSLC/HSSLC Diploma 70 percentage ha jrong bad ïa ki Bachelor Degree + Master Degree – 65% shaneng.
Nalor ki samla pule, ki don ruh ki jingai sngewbha na ka bynta ki samla kiba don ka sap kyrpang kiba la mih khmat ïa ka distrik sha ka State ne National Level kum ha ki Sport Swimming, Super Star jong ka Dancing ne Singing Competition bad kyrpang na ka bynta kiba pule Doctor yn shim baroh ïa kiba la pass khlem kheiñ percentage ei ei yn pdiang ïa baroh.
Halor kane ka bynta, ka RCDC ka la bthah ruh ba ki kot ba donkam ban wanrah da ka EPIC/Marksheet ïa kiba la don EPIC bad ïa ki bym pat don kin rah da ka EPIC jong ki kmie ki kpa kum ka jingpynshisha bad ïa ka tarik ba khadduh yn pdiamg hapoh ka 20 tarik u bnai ‘Nailur, 2022 bad ïa ki jingdonkam baroh ki lah ban ïa kynduh ïa ki dkhot jong ka Ranikor Constituency Development Committee ne lah ban phun ha u bah N.N. Thongni da kaba phah ïa ki kot donkam lyngba ha ka whatsapp numbers, 8787706392 ne lyngba da ka Offline – hard Copy sha ki dkhot jong ka RCDC.
Katkum ka kyrwoh khubor lyngba u nongmihkhmat jong ka Ranikor Constituency, bah Pius Marweiñ bad bah N.N. Thongni ha ryngkat ki dkhot bad ki nongkitkam jong ka Ranikor Constituency Development Committee, South west khasi Hills District ki kyrmen skhem ba lyngba kine ki lad ki lynti kan sa long ka jingkyrkhu bad ai mynsiem ïa ki khun samla jong ka dong ka thaiñ Ranikor ba kin nang kiew shaphrang ha ka pule dangle namar ba shibun ha kane ka dong ka thaiñ ki samla pule ki dang duna shibun ki ban long kum ki ophisar, ki doktor bad kiwei kiwei de.
