Khliehriat, Nailur 29 : Ka Khasi Students Union Narpuh Circle, lyngba u kyrwoh na u Education Secretary, u samla Chanmi Syrti, ka pynbna ba ïa Ka jingpynkup burom jong ka seng , ka 11th Mait Shaphrang Academic Award, yn pynlong ha Ka 6 tarik mynta u bnai risaw bad ïaka prokram yn pynlong ha Lumshnong Community Hall ha ka por 10 baje mynstep.
Ka seng ka pyntip sha baroh kito ki samla kiba na ka thaiñ Narpuh kiba la pynpoi ïa ki kot ki sla na ka bynta kane ka khusnam ba kin sngewbha ban wan mih ha katei ka tarik bad ha katei ka por ha Lumshnong Community Hall ban pdiang ïa ki khusnam.
La ong ruh ba ha shwa ban sam ïa ki khusnam kan don ka Quiz Competition kaba yn ïa shim bynta da ki khynnah skul jong baroh ki skul Secondary bad Higher Secondary school kiba don ha Narpuh bad ïa kiba ïoh ba nyngkong, ba ar bad ba lai, ka seng kan pynkup burom ïa ki ruh kumjuh da kane ka khusnam.
Ha katei ka sngi, ka seng kan pynbna ruh ïa ka result jong kito kiba jop ha ka jingïakop thoh essay ba ka seng ka la dep pynlong myn ha ka 5 tarik u jylliew 2022, kaba dei ka sngi ba kyrpang, ka sngi pynneh mariang ka World Environment Day, ha kaba ki la don san tylli ki skul na Elaka Narpuh kiba la wan ban ïashim bynta ha kane ka jingïakop thoh essay bad ïa kiba jop ha ka kyrdan kaba nyngkong, ba ar bad ba lai ïa ki ruh yn pynkup burom lang ha katei ka sngi.
Ka jing pynkup burom jong ka seng kan long ruh da ki syrnot bad ki momento.
