Khliehriat, Nailur, 12: Ka Khasi Students’ Union (KSU) Narpuh Circle lyngba u kyrwoh khubor na u Education Secretary, u samla Chanmi Syrti la pynbna sha ki samla pule ka thaiñ Narpuh ba ka seng kan pynkup burom ïa ki samla pule kynthei bad shynrang kito kiba pass bha ha ki kyrdan ba shakhmat ne kiba ioh ha ka kyrdan 1st division ha ki exam jong ki ha ki kyrdan bapher bapher jong mynta u snem 2025, kata ha ka final exam SSLC, HSSLC, Degree bad master degree na ki board jong ka MBOSE, CBSE, ICSE bad University bad kiba na kiwei kiwei ki jingpule ruh kum kiba pyndep ïa ki jingpule Engineering bad kiwei kiwei ki jingpule.
Ka seng kumba long man la u snem ka shim ïa ka kabu ban pynkup burom ïa ki samla pule kum shi bynta ban ai mynsiem bad pynshlur ïa ki ha ka liang ka pule puthi.
“Kumta kane ka dei ka kyrwoh kum ka jingpyntip shaphi ki samla pule jong ka thaiñ Narpuh ba lada phi kwah ban ioh pdiang ïa katei ka jingpynkup burom (Award) kaba la tip kum ka “14th Mait Shaphrang Academic Award 2025” phin sngewbha ban pynpoi ïa ki xerox copy jong ki marksheet bad ka syrnot sngikha ne ka birth certificate jong phi sh ka ophis jong ka seng kaba don ha Lumshnong lane phi lah ruh ban contact ha kine ki number phone 9862702117, 6009103554 bad ïa ki kot ki sla ba donkam dei ban pynpoi ha lane shwa ka 20/09/2025” pynkut u kyrwoh jingpynbna na ka seng.
