Shillong, Nohprah: Ka Executive Committee ka Dorbar Shnong Mawlai Nongkwar, Shillong ka la rai ban pynglong ïa ka jingpynkhuid Shnong ha ka 16/12/2022 (Sngi Thohdieng) ka ban sdang naduh ka por 8:00 baje mynstep.Kumta ka la rai ba kan don ka jingkhang Shnong ha katei ka sngi rad haduh ban da dep ka jingpynkhuid Shnong. Nalor kata la kyrpad ïa ki trai jaka ki ba don jaka hapoh Shnong Mawlai Nongkwar ki ba la ieh shrah ïa ka jaka ka jong ki ba kin wan mih ban pynkhuid ïa ki sawdong sawkun ka jaka jong ki bad ban ïakynduh ïa ki Rangbah Dong ha ki Dong ka jong ki bad ban ai ïa ka Zerox copy jong ka kot Dulir ka jaka ka jong ki ha ryngkat ki phone nombor jong ki khnang ba kum ka Shnong kan ithuh ïa ki trai jaka bad ba kin ïoh ban ïakren ïa ki ha kano kano ka por ba ka Shnong ka don ki kam ban ïa pynbeit, kata kum ka ba pynbeit ïa u Pud u Sam ne ha ka ban shna ïa ki Lynti ki Syngkien ne ki nala Shnong.
Kumta ka Shnong ka kyntu jur ïa ki Trai jaka kiba ki la shu ieh Shrah ïa ki jaka jong ki ban shim ïa kane ka jingpyntip khnang ba kan ym buh jingeh ïa ki hadien habud. Ka Dorbar Shnong Mawlai Nongkwar ka ai Khublei advance ‘Khristmas Basuk bad Snem thymmai Bakmen’ ïa ki Nongshong Shnong ka Shnong Mawlai Nongkwar bad kumjuh ruh ïa ki Dorbar Shnong ki ba don ha ka Bri U Hynñiew Trep baroh kawei. U kyrwoh lyngba u Bah E.Mon, Secretary Dorbar Shnong Mawlai Nongkwar.
Ka Mawkhar Dorbar Shnong ha ryngkat ka jingïatreilang bad ka Seng Kynthei Mawkhar Welfare Organisation, ka Seng Samla Mawkhar, ka Mawkhar Sports club kan pynlong ka jingpynkhuid shnong ha ka 17 tarik mynta u bnai naduh ka por 7 baje mynstep haduh shi baje mynsngi.Kumta na ka liang ka Dorbar ka kyntu ïa baroh ki paid nongshong shnong, ki nongshong dukan jong ka Synod Complex, ki nongshong dukan hapoh ka dong Mawkhar, ki nongniah kali Taxi /Auto kiba hap hapoh u pud u sam jong ka Mawkhar Dorbar Shnong ba kin ïa mih ryntih lang ha katei ka sngi ba kin pynkhuid bad ñiad pushara bad airong ïa ki grill da kaba rah ïala u jong u synsar, u brut, ka shun bad ka rong na ka bynta katei ka sngi bad ka por ba la kdew.Kane ka long katkum u kyrwoh lyngba u Bah GEM Kharpuri, Secy. Mawkhar Dorbar Shnong.
Kumjuh ka Dorbar Shnong Laban, Shillong ha u kyrwoh lyngba u Bah Joy Rynjah Secretary ka pyntip ba kan pynlong ka jingpynkhuid shnong ha ka 17 tarik mynta u bnai ka ban sdang naduh ka por 8 baje mynstep haduh 12 baje mynsngi.Kumta la kyntu ïa ki paid nongshong shnong ba kin ïa mih paidbah katkum ka por ba la buh.Ha kajuh ka por la pyntip ba yn ym shah ban ïeng kali miet ha ki surok shnong bad ruh la khang ban ïaid kali hapoh shnong ha katei ka sngi tad haduh ban da dep ka jingpynkhuid shnong.
