Nongstoiñ, Jylliew, 26: Ka jingdon jong ki jait soh ba bun jait ha ki khlaw ki btap jong ka jylla Meghalaya, ka long ka jingkyrkhu kaba khraw ïa ki paitbah lada ki nang ban pyndonkam ïa ki. Hynrei kumba long mynta wat la ki don da ki hajar ki jait soh ha ki khlaw, ki shu pyut khlem da don ba nang ban pyndonkam. Haba phai ha ka jingdon jong ki jait sohkhlaw ha West Khasi Hills, u sohphoh tet u dei uwei na ki jait soh kiba kynrei bha hynrei ym ju don ba bam ne pyndonkam ïa u.
U bah Klestar Syiem uwei u rangbah na ka shnong Khliehmawlieh, u ba la ithuh bad ki nongpynïaid jong ka Indian Institute of Technology (IIT) kaba don ha Guwahati, u la pyntip ba dang ha ka sngi saitjaiñ u Kishor Goswami bad uwei u paralok jong u, u ba dei ruh u stad wan bniah ha kaba ïadei bad ki jait soh khlaw, ki la wan sha Nongstoiñ ban pynshai ha ki nongrep ha kaba ïadei bad ka jingdonkam jong u soh phoh tet bad ka jinglah dor jong utei u jait soh ha ki iew ki hat jong ka pyrthei.
Katei ka Institute ka dei ruh ka kynhun kaba la ithuh da ka sorkar pdeng bad ba ka sorkar pdeng ka la kyrshan pisa na ka bynta ba kan pyntreikam, ha kaba kyntiew ïa ka rep soh bad ban pynpoi beit ïa ki lad jingïarap sha ki nongrep, khlem da ïaid lyngba na ki tnad treikam jong ka sorkar jylla.
Kitei ki stad wad bniah haba pynshai ha ki nongrep ha katei ka sngi ki la ong ba ïa u sohphoh tet ym lah ban shem ha kiwei pat ki ri ka pyrthei, hynrei la shem ïa u tang ha Meghalaya, Manipur, Nagaland, Burma bad Malaysia. Ki la ong ruh ba dei na kata ka daw ba ki ri ka pyrthei ki donkam haduh katta katta ïa utei u jait soh. Ki la ïathuh ruh ba ha ki jylla ba shathie jong ka ri India, utei u sohphoh tet lane wild apple u shong dor haduh hynñiewspah tyngka shi kilo.
Kumta na ka bynta ka jingmyntoi jong ki nongrep ha kane ka jylla, ki la dep phah ïa ki briew jong katei ka Institute ha ki katto katne ki jaka ha West Khasi Hills, ba kin pyndep ïa ka jingwad bniah bad hadien ba ki la wan rah ïa ka kaiphod, ki la lap ba ka West Khasi Hills ka dei ka District kaba biang bha ban thung ïa utei u jait dieng soh bad ka suiñ bneng ruh ka biang bha.
Kumta na ka bynta ban pyntreikam shait shait ïa ki skhim jong ka sorkar pdeng, kitei ki stad wad bniah ki la ong ba ha u bnai Naitung ban wan kin sa pynpoi ïa ki tynrai dieng soh phoh tet ïa kiba ki la dep sara ha ka jaka ha Guwahati. Ïa kine ki tynrai dieng soh yn sa sam sha ki nongrep ha Nongstoiñ bad ha katei ka por kin wan lang bad kin ai ka jinghikai kumno ban rep ïa utei u jait dieng soh.
