Shillong, Nailar 30 : Ha ka juk kaba jan baroh ki pyrkhat tang na bynta ka jingmyntoi shimet, hynrei dang don pat ki shnong kiba dang pyrkhat na bynta ki para shnong kiba don ha ka khia ka shon ne kiba dang kham duna ha ka ïoh ka kot.
Kane ka rukom pyrkhat ba kham pher ka la paw pyrthei ha ka sngi ba ka MDC jong ka Nongshken, Kong Grace Kharpuri ka la aiti ïa ka trok kit ñiut ha ka Dorbar Shnong Mawlynnong, ka shnong kaba pawnam ha ka jingkhuid ym tang ha ka ri India hynrei wat ha ka dewbah Asia ruh.
Ha ryngkat ka jingdonlang ka MDC, u Rangbah Shnong, Bah Thomlin Khongthohrem u la pyntip ba man u snem ki pynlut da ki lak tyngka ban wai kali na ka bynta ban leit pynhap ïa ki ñiut shisien shibnai shaduh Marten.
Hynrei u la ong pat ba da ka jingai jong ka MDC ïa katei ka trok mynta ki lah ban pynlang bad tyngkai noh ïa ka pisa kaba tam na kaba theh umphniang ïa ka kali bad pynshna ïing noh ïa kiba kham duna ka ïoh ka kot ha katei ka shnong.
“Man u snem ngi pynlut kumba 15hajar tyngka ban wai kali ban leit pynhap ïa ki jaboh jabain (plastik) sha Marten bad kumta ha ka shisnem ka la poi palat lak tyngka. Hynrei mynta da kane ka kali ba ai i MDC ngim donkam shuh ban wai kali hynrei tang ka bai umphniang kumta ngi la ïoh ban kynshew. Kumta, ka pisa kaba tam na kane ngin sa ïoh pat ban pynshna ïing baduk ïa kito kiba kham donkam eh kaban pynkmen ïa ki hapdeng ka jingduk,” u la ong.
Katba ka Kong Grace haba kren kum ka Kongsan ka la ong ba ki MDC mynta ki trei katkum ka jingïaid kajuh, kata ban shna ain kaba long katkum ka jingïaid ka por. Ka la ïathuh ruh ba dang shen u Lat u la mynjur ïa ka ain kaba ïadei bad ka khuid ka suba ha ki shnong ki thaw kaba la tip kum ka KHAD Solid Waste Management 2020.
“Dei halor kane ka aiñ ba ngi la sdang ban pyntreikam ban khmih ban peit ïa ka khuid ka suba. Nga hap ban ai jingïaroh ïa ka shong Mawlynnong kaba hap ha ka constituency jongnga kaba la paw ha ka ri bad ka pyrthei baroh kawei na ka jingkhuid tam,” ka la ong.
Shuh shuh ka ong ruh ba dei ka jinglong jingman jong katei ka shnong ba u Blei ruh u la plie lad ïa ki ban ïoh ïa katei ka trok kit niut namar kum ka MDC ka khlem poi pyrkhat satia ban ai ïa katei ka kali sha ka Mawlynnong namar la shu rai kyrkieh ïano ban ai namar ba ka constituency ka la ïar bad lada bakla ban ai ruh lehse kan shu long lehnohei.
Ka la ïathuh ruh ba ka la shu phone ïa u Bah Aibor Tynsong, secretary ka NPP ban phah jied lem ïa ki shnong kiba donkam tam bad kumta ma u mardor u la phone pat ïa u Bah Steven Kshiar ha kaba khatduh la la jied ïa ka shnong Mawlynnong kaba ki nongïalam shong ruh da ka mynsiem kaba kmen ki la pdiang sngewbha ïa katei ka trok.
Da kaba pynpaw ba mynta ki paidbah kim sngewthuh shuh ïa ka jingkordor kumno ban sumar ïa ka mei mariang, ka MDC kaba dei ruh ka Executive Member ka tnad Market ha KHAD ka la ong ruh ba dang hynin ka sngi kum ka Council ki la la wan jurip ïa ka Ïewduh ha kaba ki la sakhi ïa ka jingjaboh kaba la palat pud.
“Kumta lada ngi ring mynsiem ïa ka jaboh jabaiñ ngin ym ïoh ïa ka met kaba koit ba khiah bad haba ngim don ka met kaba koit ba khiah ka Jaidbynriew ruh kan thut hynrei ka Jaidbynriew kaba khlain ka jingtreikam ruh kan khlain ha ka imlang sahlang,” ka la bynrap biang.
La ïoh ruh ïa ka jingkren na u Bah Aibor Tynsong, Bah Steven, nangta na u President ka NPP Pynursla nalor kiwei kiwei ryngkat ka jingdonlang ki riewrangbah ka shnong, ki nongshong shnong bad ruh ki khynnah skul.
