Shillong, Ïaiong 21:Ka Sorkar Jylla kala rai ban pynieng noh da ki durmot ba radbah (gigantic figure) jong ki lai ngut ki khla wait ka Jylla ha phyllaw jong ka Tnad Arts & Culture kaba don ha State Central Library.
Kine ki durmot ki dei jong u Tirot Sing Syiem, u Kiang Nongbah bad Pa Togan N Sangma ïa kaba yn sa pynieng ha syndah jong u mot laidong ha State Central Library.
U Myntri ka Tnad Arts & Culture Bah Sanbor Shullai ula hiar jurip ïa kane ka jaka hynne ka sngi ha ka jingdon lang jong ki Ophisar ka Tnad Arts & Cultre bad u Bah Raphael Warjri Chief Creative Director ka Riti Academy of Virtual Arts u ban pyntrei ïa ka project.
Ïa u mot laidong bajrong kynshyeng yn sa bynrap da ki durmot ba radbah jong ki laingut ki khlawait ba pawnam ryngkat ka rynsan ba shynna na ka bynta ban kyntiew burom da ki syrwiang syntiew ha ki sngi lyngkhuh snem jong uwei-pa-uwei na ki khlawait.
U Bah Sanbor haba kren ha kane ka sngi ula ong ‘Katto katne ki seng bhalang ha jylla ki la aijingmut ban shna da ki motdur ba shynna bad baphuh baphieng jong ki khlawait ka Ri kumba la dep shna ïa ki motdur jong ki riewkhraw ka Ri India, ka Indira Gandhi bad u Netaji Subhash Chandra Bose’.
“Ki durmot ba thmu ban shna thymmai kin long ki nongmuna ban pynshlur bad ai mynsiem ïa ki samla ha kane ka aïom ba rakhe ïa ka lyngkhuh snem ba sanphew jong ka jylla bad lyngkhuh hynniewphew san snem jong ka Ri India” ong u Bah Sanbor..
U Bah Sanbor Shullai u la pynbna ruh ba la aiti ïa kane ka kam ba kynsai ha u barikor ba donnam ka jylla, Bah Raphael Warjri ban shtah ïa ki durmat lyngba ka synjuk ki barikor Khasi, ka Riti Academy.
“Ka long kaba donkam ban pynshlur ïa ki trai jylla khamtam ki samla ba don sap bad u Bah Raphael Warjri u la prat lynti da ka durmot ba kynsai ha khyrdop jong ka shlem Mattithaw bad Deiriti; bad ka jinglut jingsep ha ka bhah ba nyngkong ka long ha ka dor ka ba Laiphew Lak Tyngka, ha ka ba ka tnat sorkar kan sa pynbiang ïa ka bhah ba dang buddien haduh ban da dep pura. La khmih lynti ba ka durmot ba nyngkong yn pyndep nogh hapoh ka lai bnai” ula ong.
