Khliehriat, Nailar, 12: Ka ophis jong u Vice-Principal, Industrial Training Institute (ITI), Khliehriat, East Jaiñtia Hills District, ha ryngkat ka jingïatrei lang bad ka ophis jong u Assistant Employment Officer, District Employment Exchange, Khliehriat ka pynbna ba ha ka 14 tarik yn pynlong ïa ka jingpynshai paidbah bad ka jingpyni nam ïa ki tiar ki tar (Awareness cum Exhibition Programme) ha phyllaw jong ka Industrial Training Institute (ITI), East Jaiñtia Hills District, ha Khliehriat (Old DC Office).
Kane ka prokram ka long ruh kum ka jingpynshai paidbah ha kaba ïadei bad ki lad ai jinghikai ne ki vocational training bapher bapher bad ki lad ïohkam ïohjam khamtam na ka bynta ki khun samla jong ka East Jaiñtia Hills District, kiba dei ki technical &non-technical bad yn ai jingtip ruh kum ki skim sorkar na ka bynta ban kyntiew ïa ki sap ki phong ne skill development.
Katei ka jingpynshai paidbah bad ka jingpyni nam ïa ki tiar ki tar (Awareness cum Exhibition Programme) kan sdang naduh ka por 11 baje mynstep bad ha kane ka sngi yn pyni paidbah ruh ïa ki tiar ki tar ba wanrah da ki nongkhaïi ba kynthup Computer Operator bad Programming Assistant (COPA), Wireman, Driver cum Mechanic (LMV), Surface Ornamentation Techniques (Embroidery) bad Cosmetology.
U Vice-Principal ka Industrial Training Institute (ITI), East Jaiñtia Hills District u la kyntu ïa ki paidbah khamtam ki samla ba kin wan sha katei ka prokram bad ba kin rah lang ruh ïa ki Aadhaar Cards, ki dur shiteng bad ka Bank Passbook na ka bynta ban pynrung kyrteng.
