Shillong, Risaw 18: Ka phlim Rapture kaba la ïoh ïa ka jingïaroh bha ha kine ki sngi bad kaba dei ruh ka phlim ba la pynmih da u director Dominic Megam Sangma uba la ïoh khusnam, yn sa pyni ha ka sien ba nyngkong eh Shillong naduh ka 7 haduh ka 11 tarik Naiwieng, 2024.
La ong ba ïa kane ka jingpyni phlim la pynlong da ka tnad Art and Culture ka sorkar Meghalaya ha ka jingïatreilang bad ka Fraternity Art Cine Entertainment Shillong (FACES).
Ha kaba ïadei bad kane la ong ba kane ka phlim Rapture kadei kaba la khring bha ïa ki riew ieid phlim ha kylleng ka pyrthei, dang shen la pyni ïa ka ha ki 150 tylli ki jaka peit phlim ha kylleng ka ri France, ha kaba ka la ïoh ïa ka jingïaroh kaba khraw namar ka jingïathuh ïa ka khana kaba shongsbai bad ka jingringdur kiba shoh biej ïa baroh kiba peit ïa kane ka phlim.
Ka phlim, kaba la pynwandur ha ki phang jong ka jinglong tynrai bad ka jingsngew jong u briew, ka shim shibun na ki jaka ba itynnad bad ki riti dustur jong ka Meghalaya, kaba pynlong ïa ka jingpyni ïa kane ka phlim ha Shillong kaba kongsan bha.
Na ka liang ki nongpynïaid ki la ïathuh ba ki jingpyni ïa kane ka phlim kan long ha U Soso Tham Auditorium bad un pyni ïa ka haduh laisien ha ka shisngi kata ha ka por 12:15 baje janmiet, 2:40 baje janmiet, bad 5:15 baje janmiet. Ki tiket yn sa die shen, ka ban ailad ban ïoh jaka kloi sha katei ka jaka peit phlim.
