Shillong, Nailur 2 : U Myntri Rangbah ka jylla u Conrad K Sangma mynta ka Sngi Thohdieng u la pynbna ba kum ka dak ban pynsahkynmaw ïa ka jingrakhe ïa ka lyngkhuh snem Sngi Kha ba 75 jong u (L) P.A Sangma, yn pynbha briew lut ïa baroh ki jingtei bad jingshna ba la tei bad shna ha ka por jongu ha kane ka jylla baroh kawei.
U la pynbna ïa kane ka jingleit jngoh ïa ka Tura Super Market kaba la tei bad plie ha ka por u kpa jongu u (L) Purno Agitok Sangma, ha nongbah Tura, West Garo Hills ha u snem 1998. U la ong kane ka ïew paki dulan ka dei kaba la saiñdur da u kpa jongu kumta ki nongshong shnong ruh ki ai nam ïa ka ha u.
Kane ka ïew paki dulan kaba la tei saw mala ka la treikam mynta la palat 20 snem bad ka dei kawei na ki ïew paki dulan kaba heh ha kane ka thaiñ shatei lam mihngi ka ri India.Kiba bun ki la ïa pynpaw ha ki por ba mynshwa ba kaba kum kane ka ïew ym donkam satia ha Tura ba ka dei ka sor rit, hynrei mynta kane ka projek ka la long ka jingsarong ïa ka ri lum Garo baroh kawei.
U Myntri Rangbah u la ong ba kane ka ïew ruh ka la donkam ban pynbha bad pynthymmai biang ïa ka bad halor kane ka sorkar kan sa pynkhreh kumno ban pynbha bad pynthymmai ïa ka khamtam ban shna ïa kiei kiei kiba ka dang duna kum ki jaka leit bar bar ter ter.
U la ong ba ka sorkar kan sa shong ban pyrkhat bad pynshongdor katno yn pynlut na ka bynta ban pynbha bad pynthymmai ïa baroh ki jingtei ba la tei ha ka por u P.A Sangma ha kane ka jylla baroh kawei.
Ha kane ka jingleit jngoh ïa kane ka ïew u myntri rangbah ula ïoh ruh ban ïakren bad ïa khana bad ki trai dukan kiba don ha katei ka ïew bah ban twad jingmut ruh na ki kiei ki jingdonkam ban pynbha bad pynthymmai ïa kane ka ïew.
