Shillong, Risaw 15: U Vice President ka Ri u Jagdeep Dhankhar un wan ban plie ïa u mawnongrim jong ka Meghalaya Skill & Innovation Hub (MS&IH) bad leit jngoh ruh ïa ka IT Park ha ka sien wan ba nyngkong jong u ha Shillong ka ban long ha ka 16 bad 17 tarik mynta u bnai.
Katkum ka kyrwoh khubor la ong ba u Vice President un wan ha ryngkat u Dr Sudesh Dhankhar, ha ka jingwankai ba arsngi ha Guwahati, Assam bad ha Shillong ha ka sngi Balang bad sngi Palei jong une u bnai Risaw.
La ong ba u Dhankhar un buh ïa u mawnongrim ïa ka Meghalaya Skill & Innovation Hub ha Mawdiangdiang, New Shillong bad hadien kane, un sa leit ïuhkjat ha IT Park bad ha Raj Bhavan, Shillong.
La ong ba nalor kane, un ïakynduh ruh ïa u Myntri Rangbah ka Jylla ha ryngkatlang bad ki heh Ophisar ka Jylla ban ïakren ïa ki kam kiba ïadei bad ka sorkar jylla.
