Shillong, Risaw 17 : Ka Junior Christian Endeavour Society (JCES) jong ka Balang Presbytarian Mawkhar kan plie pyrda ïa ka jingrakhe dap 125 snem ha ka 20 tarik Risaw 2024 ha ka por 4 baje janmiet ha Phyllaw jongka ïing Mane Mawkhar hapoh ka jingïalam u President u bah Baika R Lyngdoh kum u shongknor.
Kan don ka jingkren bad jingplie ïa kane ka jingrakhe ne ka Jubilee, ka jingpynher lama, jingpynher ïa ki baloon bad jingduwai da i Rev (Dr)Brightstar Jones Syiemlieh.
Kan don ka jingrwai jong ki khynnah na ka kot jingrwai kaba 72 bad katba nang rwai I Pastor in ïalam ïa ki paidbah nongwan jingïaseng shapoh ïing mane. Ha kane ka jingïalam da i Pastor, yn bud ki Tymmen Basan, ki Rangbah Balang, ki Nongkitkam ka JCES, ki dkhot Committee, JCES Choir bad nangta sa ki nongwan jingïaseng. Yn ïalam jingrwai da i bah Reuben B Diengdoh bad i nongtem i Miss Varina Katie Kharumnuid.
Kumta ka JCES ka khot bad ïawer ïa baroh ki dkhot ne active member naduh kiba mynta bad kiba rim ruh ba kin ïapoi khnang khnang sha kane ka jingplie pyrda ïa kane ka jingrakhe khnang ba kan long kaba iphuh iphieng i shongkun bad i shong Blei.
