Tura, Nohprah 15 : U Myntri Rangbah ka Jylla u Conrad K Sangma lashai ka sngi Thohdieng (16-12-2022) un sa plie paidbah ïa ka stadium ïalehkai phutbol kaba don ha P.A. Sangma Sports Complex, Tura. Ïa katei ka stadium la tei ha u 2006 da u (L) P.A. Sangma bad ba la ainam ruh ha ka kyrteng jong u.
Ha katei ka stadium, nalor ka madan ïalehkai phutbol la shna ruh ka madan ïalehkai athletis bad kiwei kiwei ki jaka ïalehkai. Naduh ba la sdang ban tei ïa katei ka stadium la ïoh ban pynlong ïa ka Tura Football League bad ïa ka Subroto Cup. Ym tang ha ki jingïalehkai, hynrei la ïoh ruh ban pyndonkam ïa katei ka stadium ha kiwei pat ki prokram kum ha ka jingrakhe ïa ka Republic Day bad Independence Day.
La tei ïa katei ka stadium da ka sorkar jylla lyngba ka jingïarap pisa da ka Ministry of Minority Affairs bad ka sorkar jylla. Kadei ruh ka stadium kaba ngiam 9500 ngut ki paidbah nongpeitkai. Ka don ruh ka swimming pool kaba heh 25m x 20m, badminton hall kaba don 6 court, ka Table Tennis hall, 4 Squash Courts, Cafeteria bad ka office.
La sdang ban tei ïa katei ka complex ha u Kyllalyngkot 2021 bad watla hapdeng ka jingshah pynthut jong ka khlam jingpang Covid-19, ka State Sports Council jong ka jylla Meghalaya bad ka kynhun kaba tei ïa katei ka complex ki la lah ban pyndep ïa ka stadium ïalehkaiphutbol tang hapoh ki 2 snem.
Ka jinglut ha kaba tei ïa katei ka complex ha ryngkat ka stadium ïalehkai phutbol bad ar tylli ki indoor hall ka kot sha ka 127.7 Klur, ïa kaba yn sa plie paidbah noh ha kaba kut jong u snem 2023.
Ha ka jingplie paidbah ïa ka stadium ïalehkai phutbol kan don ruh ka jingïalehkai phutbol kaba nyngkong eh ha katei ka stadium hapdeng ka kynhun ïalehkai phutbol jong ka Meghalaya pyrshah ïa ka team ba mihkhmat ïa ka North East United Football Club.
Ha kane ka jingplie paidbah yn ïadonlang ruh u James Sangma, Myntri ka tnad ka koit ka khiah kum u smbud kongsan.
Ka sorkar jylla hapoh ka jingïalam ka NPP ka don ruh mynta hapdeng ka jingtei bad shna ïa ki jaka ïalehkai ha baroh kawei ka jylla. Ka jingshna pynbha ïa ka JN Stadium (Polo Ground, Shillong) ïa kaba yn sa pyndep noh ha u Lber 2023. Ha katei ka JN Stadium la shna ruh ïa ka indoor stadium kaba ïaryngkat bad ki indoor stadium ha ka pyrthei kaba kynthup ruh ïa ka shooting range, badminton court bad basketball court. Ka Wahiajer Stadium, Jowai kadei sa kawei pat ka project kaba heh kaba la pynkhreh ban sa plie paidbah noh ha u Kyllalyngkot 2023.
Naduh ba la wanrah ïa ka Meghalaya Sports Policy ha u 2019, ka Department of Sports and Youth Affairs ka la trei shitom ban kyntiew ïa ki kam ïalehkai bad ai mynsiem ïa ki samla jong ka jylla. Kane kadei ruh ka sienjam ha ryngkat ka jingïatreilang hapdeng ka sorkar jylla bad ka Meghalaya State Olympic Association..
