Shillong, Kyllalyngkot 29: Ka long ka kabu ksiar ïa ki khynnah ïalehkai kiba donsap ha ka phutbol ha kaba ka Meghalaya Football Association (MFA) hynne ka sngi Palei (29 tarik Kyllalyngkot) ka la pynbna ba kan plie ïa la ka jong ka shlem ai jinghikai (academy) kaba don ha Shillong kum shi bynta ban bteng ïa ka jingpynkhlaiñ ban pynroi ïa ka jingïalehkai phutbol ha ka jylla.
Kane ka shlem ai jinghikai ba la thmu da ka MFA lane ka MFA Academy, kan pynleit jingmut ha ka “rukom ai jinghikai ba la buh ryntih, ka jingpynroi kaba neh slem ïa ki nongïalehkai bad ban thaw ïa ka lynti kaba skhem na ka bynta ki samla ïalehkai phutbol ha Meghalaya ban kiew lyngba ka jingïalehkai phutbol jong ka jylla bad ka ri”, la ong ka MFA ha ka kyrwoh.
Halor kane, ka MFA kan pynlong ïa ki jingpyrshang (open trial) na ka bynta ki khynnah shynrang kiba la kha hapdeng u snem 2013 bad 2016 ban lap ïa ki sap ïalehkai phutbol kiba don jingkyrmen bad ban pynrung ïa ki ha kane ka shlem ai jinghikai.
ïa kane ka jingpyrshang yn pynlong ha ka 06 tarik Rymphang 2026 ha MFA Turf kaba dei ka madan Third Ground, ha Polo, bad kan sdang naduh ka por 9 baje mynstep. Kumta ki nongïalehkai kiba don jingthmu bad kiba kwah ban shah jied ki dei ban wan ha ka por bad ki dei ban wanrah ïa ka syrnod kha kaba biang na ka bynta ban pynshisha ïa ka rta.
Na ka bynta kito ba kwah ïa ki jingtip ba kham bñiah ki lah ban phun ha kine ki nimbar +91 9863097780 lane +91 9863771858.
Katba ki don katto katne ki shlem ai jinghikai kiba la don lypa ha Meghalaya kiba la seng bad pynïaid da ki klob bad kiwei kiwei ki kynhun, ka jingsdang ïa ka MFA Academy kaba kyrpang kan pynleit jingmut ha ki jingpyrshang ban kyntiew ïa ki nongïalehkai phutbol na ka bynta ka kynhun jong ka jylla naduh ki kyrdan ïalehkai ba dang khynnah haduh ki kyrdan kiba kham heh namar ka Meghalaya ka thmu ban pynïar ïa ka jingïalehkai phutbol jong ka ha ka ri India.
