Shillong, Nailar 28 : U Myntri ka tnad Tourism ka sorkar jylla Bah Paul Lyngdoh u la ong ba ka Khyndailad kan sa ïoh ïa ka dur kaba thymmai pura hadien ba la dep ïa ka projek kaban pynitynnad lut ïa ki sawdong sawkun jong ka.
Haba pyntip ïa kane sha ki lad pathai khubor u Myntri u la ïathuh ba ka sorkar ka don ïa ka thong kaba bit bha na ka bynta kane bad ka la don ruh ka jingmang pisa ban pynurlong ïa ka kam.
“Ngi khmih lynti ba la kumno kumno ba la kut ka por slap ngin sa lah shisha ban sdang ïa ki kam bad phin sa ïohi ïa ka dur kaba thymmai jong ka Khyndailad,” la bynrap shuh shuh u Myntri.
Katkum ka jingong jong u, kane ka jingpynkylla dur kan long kaba paka ha kaba yn sa buh lut ïa ki jingpynitynnad kiban ïahap bad ka jinglong ka jaka khamtam ban khring ïa ki nongwan kai sha kane ka jylla.
Ha kajuh ka por pat, u Myntri u la ong ba ki trai dukan ha Khyndailad ki la ïoh jingmyntoi na ka jingpynkynriah ïa ki nongdie marbam sha ki jaka ba la buh kyrpang ban die.
U ong ruh ba kane ka sienjam ka la pynkylluid ïa ki lynti ïaid ban rung suk sha ki dukan jong ki. Ha kajuh ka por u la ong ruh ba ki kyrmen ba ki trai dukan bad ki nongshong shnong kane ka jaka ba kin ïai bteng ban ai ka jingïatrei lang bad ka sorkar ha ki liang baroh.
Haba ïadei pat bad kiwei ki ishu kiba la mih bad kiba lah ban mih hadien u Bah Paul u la ong ba ïa kine ki kam un sa rah ban ïa kren ha ka Shillong Municipal Board (SMB).
