Yn phah kem beit, byrthen u Myntri Labour ba lap ba don ka jingai labour license thok sha ki Nongbylla

Shillong, Nailur 01 : U Myntri ka tnad Labour Bah Shakliar Warjri u la byrngem ban leh da kaba tyngeh syndon ïa ki briew kiba donkti ban leh thok haba ïadei bad ki labour licence kaba plie lad ïa ki briew kiba nabar ban ïoh wan bylla ha kane ka jylla.
Ha ka jingïakren bad ki lad pathai khubor ha kane ka sngi nyngkong u Myntri u la ong ba ha ka jingïalang buddien bad ka tnad kaba long ha ka sngi Thohdieng ba la dep ki la shim syndon ïa ka rai kaba tyngeh.
“Ha ka jinglap jongngi ka long ba don lehse ki briew kiba la leh ïa kano kano ka kam ka bym dei. Kumta nga la shim ïa ka rai mynsngi Thohdieng ba ngi dei ban ujor da ka ejahar bad kita ki briew kiba pyndonkam bakla ïa kine kiei kiei baroh ki dei ban shah kem bad ki dei ban jubab haba ïadei bad kata ka bynta,” u la ong.
U Myntri u la ïathuh shuh shuh ruh ba na ka liang ka tnad da lei lei ruh kan ym leh kino kino ki kam kiba lah ban ktah pat ïa ka jingshngaiñ jong ka jylla hi baroh kawei.
Shwa kane, u Myntri u la ïathuh ba ka tnad ka ïoh jingtip ba ha kine ki khyndiat sngi ki don ki briew kiba leh ïa ki kam bym dei ïa kiba la lap da ki sengbhalang ha ka jingleit khynra. U la ïathuh ha kane ka jingkhynra la kynnoh ba ki don katto katne ki bar jylla kiba don ïa ki licence ki bym dei lane kiba la kynnoh ba ai na ka Labour Department.
“Haba ïadei bad kata ka bynta, ha ka sngi Thohdieng ba la dep nga la shong ïa ka jingïalang buddien bad ngi lap ba kam shym la don kano kano na ka Labour Department ba ngin ai kum kata,” u la ïathuh haba kren bad ki lad pathai khubor.
Nangta, u Myntri u ïathuh ruh ba man ka lai bnai u ju shong ïa ka jingïalang buddien bad ki labour inspector haba ïadei bad ka jingleit khynra ha ki distrik kaba ki dei ban peit. U ïathuh ruh ba mynta katei ka jingkhynra ka dang ïaid bad ka dang ïai bteng kylleng ki bynta jong ka jylla.
Lah ban kdew hangne ba ki sengbhalang bapher bapher ki la tuklar da kaba leit khynra kylleng kylleng halor ka jingïoh rung ki briew kiba nabar ban wan kum ki nongbylla sha kane ka jylla.