Yn phah jingthoh sha ka Chief Secretary ban bret ñiut ha Mynkjai’

Jowai, Ïaïong 27: U Waheh Shnong ka Dorbar Shnong Iawmusiang u ma Ajoy K Lywait mynta ka sngi u ai ka jingkhublei ba kyrpang ïa ki paidbah nongshnong shnong kiba najan bad najngai kiba kloi ban ai ka jingïasnohkti lang met bad mynsiem ban pynlong ïa kane ka jingkhot pakhang shnong ba 36 kynta kaba jop bad kaba ïaid beit ïaid ryntih.
Utei u Waheh Shnong ha ka jingkren sha ki lad pathaih khubor ha ophis trei kam jong ka Dorbar Shnong ula ong hadien ba la kut kane ka jingpakhang shnong ha ka por 6 waje janmiet mar mar ka DS kala shim ïa ka Dorbar jingïalang ban ïakren sani halor kane ka kam.
“Ka jingjop jong kane ka pakhang shnong ka dei ruh lyng ba ka jingïatrei lang kumjuh jong ki Synjuk Waheh Shnong Jowai, ki shnong ba marjan, ki seng jong ki nongkamai kali, ki seng nongkhaïi, ki sengbhalang bad baroh lang kiba ïadon bynta lang”.
Ha ka juh ka por ula kyrpang ïa baroh ki nongshnong shnong ba kim dei ban sngewpher halor kane ka jingkhot pakhang kaba la ktah ïa ka kam ka jam jong ki ha kiba bun ki liang bad kane ka long na ka bynta ka jingkhuid jingsuba jong ka shnong ka thaw hi baroh kawei khnang ban ïoh ïaka jaka bret ñiut kaba pura, ong u ma Lywait.
Na ka liang ka Dorbar shnong lashai ka sngi kan sa pynlong ïa ka jingïamih paidbah kum ki nongshong shnong ha ka por 8 baje mynstep na ka bynta ban leit pynsngew sha baroh ki nongshong ïew ha Iawmusiang ba kim ym bit shuh ban bret pathar ïa ki ñiut jong hadien ba la dep ban shong die jingdie.
Namar kumba long ha kine ki sngi ba la dep tang da ka daw jong ka jingbret pathar ïa ki ñiut shi ki bynta jong ka surok kaba la wanrah ïa ka jingdheng kali kaba jur bad kaba pynthut ïa ka ïaid ka ïeng jong ki paidbah nongshong shnong.
Haka juh ka por u ai khublei ïa ki ïew ba don hapoh ka shnong kum ka Iaw Shyiap, Iaw Seiñ Raij, Iaw Chor (CNI) kila la kloi ban ïatreilang ha kane ka jingkhot pakhang shnong. Ka DS kala kyntu jur ïa ka tnad Jowai Municipal Board ba kan buh da ki kali ne ki kynja Trailer ha kito ki bynta ba jur pyllang ñiut da kaba buh lang ïa ka por khnang ba ki nongshong ïew kin ïoh tip.
Ka Dorbar Shnong kala pyntip shen kan sa leit ban ujor da ka jingthoh sha ka Chief Secretary jong ka sorkar jylla ban bthah ïa u Deputy Commissioner ka West Jaiñtia Hills District ba un pynkloi katba lah ban pynïoh ïa ka jaka bret ñiut ha ki bynta ka Mynkjai kaba dei ka jaka bret ñiur ha kine ki snem ba la dep. Ula ïathuh ba na ka liang ki shnong na katei ka thaiñ kim shem la pyrshah hynrei ki dawa ba dei ban leh katkum Solid Waste Management 2016.
Kumban shu pynkynmaw kane ka jingkhot pakhang shnong kala trei kam naduh ka step 6 waje jong ka 26 tarik ba kut mynta ka sngi 27 tarik ha ka por 6 baje jammiet, ha kitei ki kynta ka shnong kala pynlong ruh ka jingpynkhuid ïa ki ñiut ha kylleng sawdong ka Iawmusiang.
Hapoh kine ki kynta u Waheh Shnong ula pyntip ba ki don ruh ki katto katne ki riew paidbah kiba thmu ban ïaidlait ïa kane ka jingpynbeit hynrei hadien ka jingïakren sngewthuh jingmut lem bad ki Volunteer la lah ban pynbeit khem da don kino kino ki jingmih huri hura.