Yn peitngor ki Pulit ïa ki jingtei ba thymmai ban ym kylla ktem rieh tngen ki runar: DGP

Shillong, Nailur, 25: Ki bor pulit ka jylla kin peitngor bha ha man la ki jaka ba tei ïa kino kino ki jingtei ba thymmai khnang ba ki riew runar, nongtuh, nonglute kin ym ïoh pynkylla ktem rieh tngen ïaki.
ïa kane la kren da u DGP ka jylla u Dr LR Bishnoi ha ka jingïakynduh bad ki nongthoh khubor halor ka jingkylli hato ka long kaba shisha ka jingkynnoh u MLA ka Gambegre u Saleng A Sangma ba ki riew kieng atiar ki pynlong ktem rieh tngen ïaka Medical College kaba ha Tura, West Garo Hills.
Na ka liang u DGP u la ong haba la ïoh sngew ïa katei ka jingujor u MLA u la phone mar mar sha u SP ka Tura bad utei u heh pulit u la leit jngoh ïa katei ka jaka bad u lap ba ym don ei ei kum kata. Nalor kata ula ong ruh, kumba long mynta kam don satia kano kano ka jingdon dak ba la don biang ki seng kieng atiar ha ri lum Garo. U la ong lehse ki lah ban dei ki riew runar kiba leh ïa ki kam tuh kam lute kiba pynlong jaka rieh tngen ha katei ka jaka.
U DGP u la ong “ Hooid bun ki seng kieng atiar ki la wan pyndem lut, hynrei wat la katta ruh ka tnad pulit kan ym kheiñ sting wat lada ym don dak haduh mynta ban mih biang ki kynhun kieng atiar ha ri lum Garo ruh”.
U la ong lada lap ba ki riew runar ki pynlong ktem rieh tngen ha kino kino ki jingtei ba thymmai pulit kin ym ailad hynrei kin leh da kaba tyngeh.
Ha kaba ïadei bad bad ka jingshong suk shongsaiñ ha kane ka nongbah u DGP u la ong ba ki don ki jaka ba la buh ïa ki CCTV bad ki don kiba yn dang buh. Tang kawei ka jingeh ka long ban peit ïa kitei ki CCTV ym shym la leh da ki pulit. Hynrei wat la katta ruh ki pulit ki lah ban ïarap ïa kito kiba peit ba kin tip katno kiba treikam bad katno ki bym treikam khnang ban ïoh pynbha ïaki lada ki thut ruh. U la ïathuh u myntri rangbah u la kular ruhban ai 80 tylli ki thuk thuk iaki bor pulit khnang ba kin ïoh ban pahara ha kylleng ki bynta kane ka nongbah.