Shillong, Nailar 10 : Ka sorkar jylla ka la rai ban peitngor ba kan ym don kano kano ka jingktah ïa ka shongsuk shongsaiñ ha ka sngi ba ka Sur ka Bri u Hynñiewtrep kan pynlong da ki prokram bapher ban rakhe ïa ka jingdap shisnem ka jingkhlad u nongïalam barim ka HNLC, u Bah Cheristerfield Thangkhiew kaban hap ha ka 13tarik mynta u bnai.
Lah ban kdew hangne, ba katei ka kynhun ka la dep ban dawa na ka sorkar jylla ba kam dei satia ban phah pulit sha katei ka jaka naduh ka 12 tarik haduh ka 15tarik khnang ba ka jingrakhe kan long kaba ïaid beit.
“Ka sorkar ka la shim ïa ki sienjam ban peitngor ba kan ym ktah ïa ka shongsuk shongsaiñ. Nalorkata, kumba la dep pynpaw da u Symbud Myntri Rangbah ka jylla ka sorkar ka la dep ban shim ïa ki sienjam bad kumta ngam ïohi ba kan don ka jingktah ïa ka suk ka saiñ,” ong u Myntri ka tnad Kampohiing ka Jylla, Bah Lahkmen Rymbui haba kren bad ki lad pathai khubor.
Lah ban kdew hangne ba na ka la liang ka kynhun ka Sur ka Bri u Hynñiewtrep ka la kyntu ruh ïa ka sorkar jylla ba kadei ban pyllait noh mardor ïa ka kaiphod halor ka jingshah siat ïap utei u nongïalam ba rim ka HNLC.
Ha ka 13 tarik ka ka Sur ka Bri u Hynñiewtrep, ka la rai ban sieh lama ïong ha kylleng ki jaka jong ka Ri Khasi Jaiñtia bad kumjuh ruh ban pynlong ka jingïalang ha Mawlai. Kan don ruh ka jingleit buh syntiew ha lum jingtep jong une u nongïalam barim ka HNLC. Ha ka por janmiet pat kan pynlong ïa ka jingthang mombati ha Mawlai Petrol Pump.
