Yn peit shwa ïa ka pla tyngka, ong u Myntri halor ka jingdawa kyntiew kyrdan ïa ki skul Adhoc

Shillong, Nailur 22 : U Myntri ka tnad Pule Puthi ka sorkar Jylla Bah Lahkmen Rymbui u la ong ba ka sorkar jylla kan sa shong bishar halor ka jing dawa kyntiew kyrdan ïa ki skul Adhoc sha ki deficit system katkum ka jinglong jingman ka pla tyngka.
Kane ka jingong jong u ka la mih hadien ba ki nonghikai hapoh ka lama jong ka Federation of All School Teachers of Meghalaya (FASTOM) kaba la ju dawa ban kyntiew kyrdan noh ïa ki skul adhoc sha ka deficit system.
Haba kren sha ki lad pathai khubor ha kane ka sngi Nyngkong, u Myntri u la ong, “Ka sorkar kan shim ïa ka rai katkum ka jinglong jingman jong ka platyngka.” U la pynpaw ruh ïa ka jingeh halor katei ka mat bad ong ba kane ka ishu ka donkam ban da bishar bniah bha bin pa bin.
“Kane kam dei shuh ka mat kaba thymmai hynrei kadei kaba la slem bha. Tangba kam long kaba suk pat ïa ka sorkar ban leh namar ba ka donkam ïa ka jinglut kaba bun bha,” u la bynrap biang.
Nangta u la kdew ruh ba ka sorkar ka la dep ban kyntiew ïa ka tulop jong ki nonghikai ha u snem 2021 – 2022 bad kumta u la kular ba kin sa bishar bniah bha shwa ïa kane ka bynta bad lada jia ba ka jinglong jingman ka pla tyngka ka biang, kin sa shim ïa ka rai.
Ha kajuh ka por u Myntri u la pyntip ruh ba u Commissioner and Secretary u la dep ruh ban kynduh ïa ki synjuk bapher bapher bad kumt ka sorkar ka la rai ba kan shim ïa ka sienjam ban bishar bniah bha ia kane ka ishu.
“Hynrei kumba ka long mynta ngam pat lah ban ong eiei. Tangba ngi hap ban peit kaei kaba bha tam kaba ngi lah ban leh na ka bynta baroh,” u la ong.
Da kaba kyntait ban ong ei ei shuh halor kane ka bynta, u Myntri ula ong ruh ba kam dei ruh kaba suk ïa ka sokar lane ïa ka tnad ba kan shim rai mynta mynta hynrei ki donkam pat ban bishar bniah ban ai kaba bha tam.
Lah ruh ban kdew hangne ba kane ka kynhun jong ki nonghikai FASTOM ki la sdang ha kane ka sngi Nyngkong ïa ka jingïakhih jong ki ban pynsngew halor kitei ki mat jingdawa.