Shillong, Nailur: Ka Senior Christian Endeavour Society jong ka Balang Presbyterian Pynthor-umkhrah kan pdiang ïa ka National Convention ba la tip kum ka ‘Triennial Convention of C.E. India’ naduh ka 9 haduh ak 11 tarik mynta u bnai.
Ka Christian Endeavour ka dei ka Jingïaseng Samla kaba nyngkong eh ha ka pyrthei bad kumjuh ha ka Ri Khasi Jaiñtia.La Seng ïa ka da u Rev. Dr. Francis Edward Clard ha ka 2 tarik Rymphang 1881 ha Wiliston Congregational Church, Portland, USA.Ka la wan poi sha ri India ha ka snem 1883 ba la seng ha Udaril (Mumbai), Madurai bad Mandanapali.
Nangta pat ha Ri Khasi la seng ha Balang Mawkhar bad Nongsawlia ha ka snem 1896. Kane ka National Convention kalong kaba nyngkong eh ban long ha Meghalaya kum ka jylla ba pura bad kaba ar ka ban wan ha Shillong hadien 66 snem ba la pdiang da ka Mawkhar Church CE Union ha ka 10-13 tarik Jymmang 1956.
Na ka liang ka National Convention Hosting Committee, ha u kyrwoh lyngba u Dr. Batskhem Sten Secretary ka pyntip ba kin don kumba 350 ngut ki delegate ki ban wan na kylleng ka ri India kynthup ïa ki nongmihkhmat na ka World Christian Endeavour Union. ïa ka jingïaseng plie ïa ka Convention yn pynlong ha ka 9 tarik ha ka por 2 baje nohphai sngi ha phylla ïingskul ka Balang Presbyterian Pynthor-umkhrah, ha kaba u President ka CE In India u Rev. Dr. John Bashkar un kyntiew ïa ka lama.Nalor kata kan don ruh ka jingpyllait ïa ka kot sahkynmaw da u Myntri Rangbah ka jylla, u Conrad Sangma uban long ruh u Kongsan ha katei ka sngi.
Ha kane ka Convention kin don ki prokram bapher bapher bapher, kata kum ka cultural programme, Musical Night, Carol Singing bad kiwei kiwei nalor ki jingïaseng paidbah. ïa ki jingïaseng baroh man la ka janmiet yn pynlong ha ïingmane bad phyllaw ïingskul, hynrei ha ka sngi U Trai ha ka por 10 baje mynstep abd 1:00 mynsngi yn pynlong ha Madan Polo.
Kin don ki jingrwai ba kyrpang na ki CE na South India, North India, NEICE Union, KJP Synod Sepngi, Ri Bhoi Presbyterian Synod CE Union, Mawkhar Church CE Union, Mawprem CE Society, Jowai CE Society, Pynthorumkhrah CE Society bad kiwei kiwei.
Ki nongkren ha kine ki jingïaseng ki long ha ka 9 tarik por 6 baje janmiet Rev. BB Lamin (Moderator PCI), 10 tarik por 6 baje janmiet Rev. A. Thapa, 11 (Sngi U Trai) por 10 baje mynstep, Rev. SK Sahu (Vice President, World CE Union), 1:00 mynsngi Rev. GPL Gadew bad 5:30 jan miet Rev. Babu Rao (Vice President Madras Diocese CE Union).
Kumta na ka liang ka Balang Pynthorumkhrah ryngkat bad ka Senior CE Society ka khot sngewbha ïa ki para Endeavour bad ki para bangeit ban wan sha kane ka jingïaseng. Na ka bynta kito kiba wan ha ka sngi U Trai, ka jaka pynïeng kali kan long ha Parking Lot madan Polo, marjan bad ka jaka long jingseng.
