Yn myntoi kumba 1200 tylli ki nongri khñiang bad nongthaiñ jaiñ lyngba ka project ba 4.61 klur

Nongpoh, Lber 30 : Ka long ka jingmyntoi bad ka jingkyrkhu kaba khraw ïaki nongri khñiang bad kumjuh ruh ki nongthaiñ jaiñ ha ka them Ri-Bhoi, hadien ba u Myntri Rangbah ka jylla u Conrad Ka Sangma u la plie paidbah ïa kawei ka projek kaba la tip kum ka Ri-Bhoi Silk Dream: E-RISE (Eri–Rearing, Innovation, Spinning and Empowerment) bala pynlut kumba 4.61 klur ka ban ai jingmyntoi ïa kumba 1200 tylli ki longiing ha 5 tylli ki Block jong ka them Ri-Bhoi kiba im da ka thaiñ ka wet bad ka kam ri khñiang ban pynmih ïa u ksai ban thaiñ jaiñ.
Ka thong jong kane ka projek ka long ban pynkhlaiñ ïaka jingpynmih ïa u ksai ban pyndonkam haka jingthaiñ jaiñ, ban kyntiew ïaka iohkam iohjam haki thaiñ nongkyndong khamtam ban kyntiew ïaka ioh ka kot ki longkmie kiba ju kamai da kane ka kam, khamtam ban pynlong ïaka Ri-Bhoi kum kawei naki district ka ban lamkhmat haka ri hi baroh kawei halor ka jingpynmih ïaki jaiñ ki bym pyndonkam dawai.
Ha kane ka sngi nalor u Myntri Rangbah la sakhi ruh da ka jingdonlang u Bah Sosthenes Sohtun Myntri ka tnad C&RD ka jylla, u Dr Celestine Lyngdoh MLA ka Umsning, u Bah Mayral Born Syiem MLA ka Nongpoh, ka Kong Rona Khymdeit MDC ka Nongpoh, u Abhilash Baranwal Deputy Commissioner ka Ri-Bhoi, u Giri Prasad Superintendent of Police ka Ri-Bhoi, ki ophisar naki tnad sorkar bapher bapher, ki nongïalam shnong lem bad ki kynhun SHGs, ki nongthaiñ jaiñ, ki nongri khñiang bad kiwei kiwei.
Haba kren ha kane ka sngi naka liang u Conrad K Sangma u la ong ba bunsien kum ki nongmihkhmat paidbah, ngi shim sting ïaka kam bad kyndit bynriew ynda la poi ka elekshon, kane kam dei ka kam synshar bad jingshakri bala ai da ka sorkar MDA, hynrei kum ka sorkar ngi long kiba kitkhlieh bad ban ai kaba bha tam sha ki paidbah, ban sngap ïaka jingeh jong ki bad khamtam ban don ka jingïadei kaba jan kumba dang shen u Myntri Rangbah u la wan ban iuh kjat ha Umsning bad shibun ki kam pynroi kila urlong kumba ki paidbah kila ud la nam haka prokram CM Connect.
Hynrei kane ka sngi ka long ka sngi kaba ban sah jingkynmaw namar ki nongri khñiang bad ki nongthaiñ jaiñ khamtam ki longkmie kiba ju im bad kamai jakpoh da katei ka kam kin sa myntoi shi katdei bad ka jingpynmih ïa u ksai ba baroh shikatta ki ju thaiñ da ka kti kan sa kiew bun shah namar mynta ki nongthaiñ ki ioh ban pyndonkam da ki mashin ki ban thir ksai bad ban pynmih kham bun haka dor kaba kham rem bad lyngba kane ka thong ki nongri bad nongthaiñ naka them Ri-Bhoi kin kiew arshah haka jingpynmih bad kumjuh ruh ka ioh ka kot bad ka iew ka hat ba ki lah ban pynïaid iew ïaki mar ba kila dep pynmih.
Ha kane ka sngi naka liang u Myntri Rangbah ryngkat u Myntri lem bad ki MLA kila sam ruh ïaki ERISE mashin ban pyndonkam haka jingthir ksai, ki jar bad kumjuh ruh ka pisa sha ki nongioh jingmyntoi ba kin lah ban kyntiew ïaka kam thaiñ bad thir ksai.
Ha kane ka juh ka sngi naka liang u Myntri Rangbah, u la pynlait paidbah ruh ïa ka FILO App, kaba la shna kyrpang ban ïarap ïa ki samla pule ha Ri Bhoi District. Kane ka app kan ai jingïarap 24 kynta ïa ki khynnah skul naduh klas 9 haduh klas 12 lyngba ki notes, bad kiwei ki jingdonkam ba ïadei bad ka jingpule.
Nalor kata, ka FILO App kan long ruh ka jingïarap kaba kongsan ïa kito ki samla kiba la dep ïa ka klas 12, ha kaba kin ïoh jingïarap ban pynkhreh ïa ki eksamin bad ban wad kam, la ka long ha ki kam sorkar jylla ne sorkar pdeng.