Yn mihkhmat u samla Donbor Rumnong sha ka rynsan ïakop pyni dohksah ha Pune

Shillong, Ïaïong 08: U samla Donbor Rumnong un sa leit ban mihkhmat ïa ka Jylla ban shim bynta ha ka Mr Universe India ka rynsan pyni dohksah kaban sdang naduh ka 15 haduh ka 17 tarik Ïaïong 2022 ha Pune.
Kum ka jingai mynsiem, na ka liang ka Hynñiewtrep National Youth Front (HNYF) East Khasi Hills ha ka sngi Thohdieng kala pynkup burom bad kitbok kitrwiang ïa u samla Donbor Rumnong ha Shillong Press Club. Nalor u samla Donbor, ka HNYF kala pynkup burom ruh ïa ka samla Badalin Kharbyngar kaba ju long ka lahduh ha ka Asia Arm Wrestling bad kaba la jop lahduh ha ka NorthEast Level Shillong Arm Fight 2022 kaba la long ha ka 12 tarik u Lber ha Nongbah Shillong.
Haba kren sha ki lad pathai khubor u samla Donbor Rumnong u la ai khublei ïa ka HNYF kaba la kynmaw bad ai mynsiem na bynta jong u ha ka jingleit shim bynta jong u ha katei ka rynsan bah bad ïathuh ruh ba un sa mih na la ka jong ka Jylla ha ka 14 tarik mynta hi u bnai.
Ha katei ka jingïakop pyni dohksah ki don haduh 1500 ngut ki nongïashim bynta na ki 100 tylli ki ri bad u samla Donbor udei tang ma u marwei na ka jylla ban leit ïashim bynta ha katei ka jingïakop ha ka kyrdan Men’s Physique Fitness Model bala pynlong da ka Indian Bodybuilding and Fitness Federation (IBBFF) lyngba ka International Federation of Bodybuilding and Fitness (IFBB).
U samla Donbor u la ïathuh ba u la dep ban pynkhreh bha ïalade mynta la hynñiew bnai na bynta ban leit aireng ha katei ka rynsan. “Kane ka jait jingïalehkai ka pher na kiwei pat kaba hap ban pynkhreh hynriew haduh hynñiew bnai eiei bad ban sumar bha ruh ïa ka met da kaba bam ïa ki jingbam ba long tyrkhong,” ong u samla Donbor.
U la ïathuh ruh ba ha kane ka jingïakop ka jingjop ka shong ha ka jinglong jingman jong ka met, ka jingheh bad jingpait ki dohksah bad ruh ka jingjrong.
Katba na ka liang u Bah Marbud Dkhar bad u Bah Bless Dkhar ki la ai mynsiem bad kitbok kitrwiang ïa u samla Donbor Rumnong ba un ïoh kheit ïa u soh ba thiang ha katei ka rynsan pyni dohksah ban wanrah ïa ka nam bad burom ïala ka jong ka jylla. Kum ban pynkynmaw hangne u samla Donbor Rumnong u la jop teng ruh ïa ka Mr India 2019.