Yn mihkhmat ka Musniang SS, Wapung HSS bad Lotus SS ïa ka East Jaintia ha ka State Level Subroto Cup 2025

Khliehriat, Jylliew 15: Ka District Level Inter-School Subroto Mukherjee Cup 2025 ba la pynlong da ka ophis District Sports Officer, East Jaintia Hills District kaba la sdang naduh ka 04 tarik Jylliew 2025 la pynhap pyrda noh ha ka 13 tarik Jylliew ha madan phutbol Deinshynrum Hills District, East Jaintia.
Ha kane ka sngi pynhap pyrda la don lang ruh ka MDC ka Rymbai-Khliehriat, ka Kong Violet Lyngdoh, Additional Superintendent of Police ka East Jaintia Hills District, kong S. Stephanie M. Rasang, Principal skul, ki nonghikai bad bun kiwei pat.
Ha kane ka tournament la mih madan da ki hynriew tylli ki team kiba ïakhun ha ka final ka Under-15 Boys, Under-17 Boys bad Under-17 Girls category. Ki lahduh mynta u snem ki kynthup ïa ka Musniang Secondary School, Wapung Higher Secondary School bad Lotus Secondary School, Deinshynrum.
Ha ka final ka Under-15 BoysCategory, ka Musniang Secondary School ka la ïohrah ïa ka namlahduh hadien ba ka la lah ban pynliem ïa ka KB Memorial Secondary School, Wapung da 3-0. Ha ka Under-17 Boys, ka Wapung Higher Secondary School ka la ïohrah ïa ka namlahduh hadien ba pynliem da 4-0 ïa ka Sein Jait Tuber Higher katba ha ka Under-17 Girls Category ka Lotus Secondary School, ka Deinshynrum ka la jop da 2 kol lyngba ka ïashut tie breaker pyrshah ïa ka Sanshnong Secondary School.
Hadien ba la kut ka jingïalehkai, la sam ruh ïa ki khusnam sha baroh ki team lahduh bad kiba wan ba-ar kumjuh ruh ïa ki khusnam shimet kynthup ka Best Player of the Tournament 2025 hala ki jong ki jong ki category. U Everlasting Dkhar ka Musniang Secondary School u la ïohrah ïa ka nam ‘Best Player’ ha ka Under-15 Boys Category katba u Daemitre Rymbai ka Sein Jait Tuber Higher Secondary School u la ïohrah ïa ka nam ‘Best Player’ ha ka Under-17 Boys katba ka Thehlut Sana ka Sanshnong Secondary School ka la khur ïa ka nam ‘Best Player’ ha ka Under-17 Girls.
Kitei ki lai tylli ki team kin mihkhmat ïa ka East Jaintia Hills District ha ka State Level Inter-School Subroto Cup 2025 ka ban sa long ha nongbah Shillong.
Ki lai tylli ki skul kiba jop kin mihkhmat ïa ka East Jaintia Hills District ha ka State Level Inter-School Subroto Cup 2025 kaba la buh ban long shen ha nongbah Shillong.