SHILLONG, Risaw 07: Ka Meghalaya Chess Association (MCA) ka la ïoh ban pynlong ïa ka “1st Meghalaya State Team Chess Championship 2024″ ha ka 05 tarik Risaw, 2024 (Sngi Saitjaiñ jong ka taïew ba ladep) ha Government Girls H/S School, Shillong ha kaba 12 tylli ki kynhun (Team) na ki District bapher bapher jong ka Jylla kila wan ïashimbynta.
ïa kane ka Tournament la pynlong katkum ki kyndon jong ka FIDE Swiss Rules kaba kynthup ïa 4 sien ki wat ïakhun.
Ka kynhun jong ka ‘Meghalaya United’ hapoh ka jingïalam jong u Bobby Lyngdoh kum u kapten, ryngkat bad u Silkam Sangma, Rijied Katrai, Barbith Sangma bad Krusen Shira (Reserved) ki la ïohrah ïa ka namlahduh.
Katba ka ‘Game Challengers” ba kynthup ïa u Ardhendu Sekhar Mandal (kapten), Amar Bhandari, Gipolson Pahsyntiew, Anubhav Sharma bad u Amit Saraf (Reserved) ki wan ha ka kyrdan ba ar.
Kumta, da kane ka namjop, ka “Meghalaya United” kan ïoh ban mihkhmat ïa ka jylla ha rynsan ïakop jong ka ‘North-East Team Chess Championship 2024″ ka ban sa long ha Sikkim naduh ka 20 tarik haduh 23 tarik Risaw, 2024.
