Shillong, Naitung, 09: Shen ka ka Khasi Hills Autonomous District Council (KHADC) kan sa lum ïa ki khlieh nongsynshar jong ki Hima na ka bynta ban ïathir ïatai halor ka Instrument of Accession kaba long ka dulir ïasoi ba la pynrung ïa ki Hima Khasi hapoh ka dewbah India kaba la jan dap hynñiew snem eiei.
Ka rilum Khasi ka kynthup ïa ki 25 tylli ki Hima kaba pynlong ïa ka Federation of Khasi States.
U Chief Executive Member (CEM) jong ka Khasi Hills Autonomous District Council (KHADC) u Bah Titosstarwell Chyne haba jubab ha ka Motion ba la wanrah da u Nongïalam ka Liang Pyrshah u Bah PN Syiem u la ong dang dei ban pule bniah ïa ka Instrument of Accession bad ïa ka Annexed Agreement la ïasoi da ka Federation of Khasi States bad ka Sorkar India hapdeng ka 15 tarik, Nohprah, 1947, bad ha ka 19 tarik, Lber 1948.
Ïa kane ka soskular ba la buh bad ki kyndon ba la ïasoi da ki Hima Khasi la soi da u Governor General of India, u Chakravarty Rajagopalachari, ha ka 17 tarik, Nailar, 1948.
“Ngin sa khot jingïalang ïa ki khlieh nongsynshar shnong ban ïakren halor kane ka kam shwa ban ïaid shakhmat,” ong u Bah Chyne.
U la ong ba ka jingdonkam ban ïathir ïatai biang halor ka Instrument of Accession bad ka Annexed Agreement ka long halor ka jingtyrwa jong u Bah PN Syiem hapoh ka Dorbar Lyiur jong ka Iingdorbar Thawaiñ ka KHADC kaba dang shu kut ha ka sngi Thohdieng.
“Ban sngewthuh shai ïa ki kyndon ba la ïasoi ha ka Soskular ka long kaba donkam bha namarba bun na ki kyndon kiba konsan ki dang jah na ka Sixth Schedule jong ka riti synshar ka ri India,” u la ong.
Ïa ki kyndon ba dang jah dei ban pynrung ha ka Sixth Schedule, ïa kaba lah ban pynbeit thymmai da ka Parliament.
U Bah PN Syiem haba bynrap halor kane, u la ong ba ka Federation of Khasi States ka la pan ïa ka kyrdan bakyrpang ïa kaba ym shym la lah satia ban pynrung.
“Ïa ka Nagaland la ai ïa ka kyrdan bakyrpang hapoh ka Article 371A, kaba dei ka jingai jingmut ba la tyrwa da ka Federation of Khasi States,” u la ong.
