Shillong, Iaiong 10 : U Lamphang ka ïing Dorbar Thawaiñ ka jylla u bah Metbah Lyngdoh ula pynpaw ba un sa lum bad ïamir jingmut lang ba baroh ki volunteers kiba ïadon bynta ha ka jingïaleh ban ïoh ïa ka jylla Meghalaya ba pura khnang ban tip bniah ïa ka jingïaid lynti jongki ha katei ka jingïaleh na ka bynta la ka jong ka jylla.
ïa kane u la pynpaw haba kren kum u kongsan ha ka jingïalang plie ka Women’s College ïa ka jingrakhe dap 50 snem ka jylla ha ka jingïadon lang I MLA ka East Shillong Constituency i Dr Ampareen Lyngdoh ha ka 9 tarik mynta u bnai. ïa kane ka prokram la pynlong lang ruh da ka Avenues Shillong.
Hadien kane ka prokram la pynlong ruh ïa ka Meghalaya Entrepreneurship Conclave 2022 ha kaba la pynlong ïa ka jingïathir nia halor ka phang ‘Entrepreneurship and the road ahead -Meghalaya next 50”.
Haba kren shuh shuh ha ka jingïalang plie u kongsan u la ong ban pynriewspah ïa ki thaiñ nongkyndong ka donkam ïa ka jingkyrshan ki karkhana rit ha ki liang baroh namar kane kan ïarap bha ïa ki paid nongkyndong ba kin lah ban im ja na ki kam karkhana ba rit.
Na ka liang i MLA ka East Shillong Dr Ampareen Lyngdoh i la ai ka jingïaroh ïa ka Women’s College kaba la pynlong ïa kane ka jingïamir bad ïathir jingmut bad i kyrmen skhem ruh ba ki kynthei ha ka jylla kin sa paw ha ka kam seng kam seng jam lajong. I la ong Ka por ka la dei eh ban phai khmat sha ki kynthei namar bun na ki ki dei ki nongpynbiang bam ïa la ki ïing ki sem jongki bad dei ban ai jinghikai bha ïa ki kumno ba kin lah ban trei ban ktah bad ïeng hala ki jong ki kjat. I la pynpaw ruh ïa ka jingthrang jongi ba ka jingpohsniew kan urlong ba kin bun ki rang bad ki thei samla ki ban pass ïa ki IAS, MCS bad kiwei kiwei ki kyrdan jingpule ba kin ïoh ban bat ïa ki kyrdan bapher bapher ha ka jylla.
