Yn leit tynruh hi ki samla sha u Myntri ba shu kular kai ïa ka madan phlang plastik

Nongstoiñ, Jylliew, 12: Ki samla jong ka West Khasi Hills ki la pynkhreh ban leit tynruh bad leit ïakren hi bad u bah Banteidor Lyngdoh Sports Minister, halor ka jingbym ïoh ka sor Nongstoiñ ïa ka Artificial turf lane u phlang plastic, kumba u la kular bad pynbna paidbah naduh u snem 2019.
Haba ïakren bad u nongthoh khubor, u bah Wanphai Dkhar uwei na ki samla ba don ka jingkitkhlieh halor ka bha ka mïat jong ka thaiñ u la ong, “Na ka liang ki jong ngi ki samla ka thaiñ ngin leit hi noh ban ïakren bad wad jingshai na u Sports Minister bad na ka Directorate jong ka Sports halor kane. Na ka liang u bah Bantei u la dep kular mynshuwa bad pynbna ruh ba yn pynïoh noh ïa ka Nongstoiñ da ka artificial turf, ha ka por ba u wan long kum u kongsan ban khang ïa ka football tournament ha Nongstoiñ ha u snem 2018-19”.
“Ha ka jingshisha ngi la sngewkmen shikatdei eh ha kito ki por ba u Minister u la kular ban pynïoh ïa ka artificial turf. Namar haba ngi peit ka Sports ha West Khasi khamtam ka Football bad ka Athletic, ka kiew sted bha ha kine ki sngi. Shibun ki khynnah samla kiba don ïa ka sap ïalehkai football ki la kiew bad ki la shah jied ruh ha ki klop kiba heh baheh jong ka State”.
“Hynrei haba ïohi pat ïa kane ka rai jong ka Sports Department jong ka Jylla, ba kam shym la kynthup ban pynïoh noh ïa ka madan kaba katkum ka standard kaba mynta, ka long kaei kaei kaba sngewsih shibun. Bunsien ngi shah iehnoh beiñ ha ka liang ki kam ïalehkai. Ngi da sngew ba kane ka long ka jingiuhroit bad ibeiñ ïa ka Nongstoiñ bad ïa ki khynnah ïalehkai”, ong u Bah Wanphai.
Na ka liang u Samla Moslander Marngar uwei na ki samla rangbah jong ka Youth Wing jong ka UDP, u la kynthoh jur ïa kane ka jingleh shilliang jong ka Sports Department jong ka jylla. U la ong ruh ba un ïa ka jingkyrshan ïa kine ki samla ki ban leit ïakynduh ïa u Sports minister ban dawa ïa ka hok.
U la ong ruh ba ka NDSA ka dei kawei ka Association kaba la rim bha ha poh ka State bad ha West Khasi Hills kaba dei peit ïa baroh ki liang. Kane ka synjuk ruh ka la pyrshang mynshuwa ban pan noh da ka artificial turf. Hynrei ha kito ki por ruh ka Nongstoiñ ka la duh noh bad la ïoh da ka Mawkyrwat. Te kane kam dei shuh ka sien kaba nyngkong ba ka Sports Department jong ka jylla ka leh shilliang khmat ïa ka Nongstoiñ.