Shillong, Risaw 19: U Lat ka jylla Meghalaya u C. H. Vijayashankar, ula pyllait paidbah ïa ka thup ba nyngkong jong ki samla pule na Meghalaya ki ban leit pyntbit ha ka Skill Development Program ha ki kam bapher bapher hapoh ka AYUSH.
Kane ka prokram ka dei shi bynta jong ka sienjam ba la shim da ka Santhigiri Ashram lyngba ka jingkyrshan jong ka Zerodha lyngba ka Corporate Social Responsibility (CSR), bad kiwei kiwei ki bynta.
La ong ba kane ka prokram ka long kum ka jingsdang jong ka jingïaleh ka ban ai jingmyntoi ïa ki hajar ngut ki samla na ka thain shatei lammihngi jong ka ri kaba kynthup ïa ka jylla Meghalaya, Assam bad Arunachal Pradesh ha ka AYUSH.
Katkum ka kyrwoh khubor la ong ba kane ka prokram kan ym dei tang ban shu ai jinghikai pyntbit hynrei yn kyntiew ruh ïa ka rukom kren ïa ka ktien phareng, ban tei ïa ka jinglong shimet bad ka jingai jinghikai ha kaba ïadei bad ka rukom pyndonkam ïa ka pisa bad kiwei kiwei ka ban pynkup bor ïa kine ki nongïashimbynta bad ki sap ki phong khnang ba kin long kiba seisoh ha ka kam ka jong ki kaba manla ka sngi.
La iathuh ba kane ka prokram kadei ruh kaba ïaid ryngkat lang bad ka Skill India bad Atmanirbhar Bharat Mission, kaba pynleit ban thaw ïa ki lad ban ïohkam ïohjam hapoh ri India kaba la kiew ha ka liang ban ai jingsumar bad ka jingai ïa ka jingsumar bad ïa ki dawai tynrai, nalor kiwei kiwei pat ki jingai jingshakri.
