Nongstoiñ, Jylliew 14: Ryngkat kiba haïing hasem, ki kmie ki kpa jong u samla Freddy Lyngkhoi u ba na ka shnong Siejlieh Nongstoiñ West Khasi Hills District, myn ha sngi robibar ki la pynlong ïa ka jingkhawai kaba kyrpang ha la ïing, namar ka jingwanrah burom jong u ïa la ka ïing ka sem ki khur ki kha bad ka shnong ka thaw ruh kumjuh, ha kaba utei u samla u ba pule ha ka Sacred Heart Boys Mawlai Shillong, u la ïoh ïa ka kyrdan kaba 5 ha ka result matrik na ka thup jong ki 20 ngut kiba kynsai ha ka jylla baroh kawei.
Utei u samla u dei u khun jong I kong Felicita Lyngkhoi bad u bah Selestin Nongsiang bad la ong namar ba u kpa u dei tang u nongap Masi bad ka kmie ruh kaba leit bylla sha kawei pat ka shnong kaba kham jngai na sor Nongstoiñ, kumta kitei ki shi jur ki la shu shaniah ha ka Meirit, Parit, jong u ba kin khmih lem ïa utei u khynnah naduh ka karta kaba u dang dap 5 snem ei ei. Pynban kaba sngewtynnad pat ban ïoh sngew ka long ba utei u khynnah u la pyndep ïa la ka kamram haba ïadei bad ka jingpule bad u la poi sha ka thong.
Ha katei ka sngi haba ki kmie ki kpa haba ïakren bad u nongthoh khubor, ki la ong ba utei u samla wat haba um ju don ryngkat naduh dangrit, pynban kane ka jinglah jong u ka la pynkyndit ïa ki bad kim shym la poi pyrkhat wat u long ruh u khynnah u ba shida shisur.
U bah Apolin Ïawphniaw Parit bad ka kong Lucina Lyngkhoi Meirit jong utei u khynnah, ki la ong ngi sngewhun jrut ïa kaei kaba u khun jong ki u la ïoh. Namar ka dei kaba pynsngew sarong lang ïa ki ruh haba ïoh ban kheit ïa u soh u ba thiang bad ka long ruh ka burom ïa ka ïing ka sem.
Kum ka ban pynshlur shuh shuh ïa ki khun shnong ka Seng Samla Shnong Siejlieh, ka la leit ban ïashimbynta lang ha katei ka sngi lehkmen jong katei ka ïing bad ki la ïapajutkti ruh ryngkat ka ka song pisa, kum ka dak jong ka jingai mynsiem lem.
Uwei na ki khun samla u la ong wat haba ka shnong Siejlieh ka ju shah kynthoh ba ka kham paw ha ki kam sniew, phewse na ka snem sha u snem ki don ki khun shnong kiba la wanrah ïa ka burom kum ka Elfie Wanniang, kaba la ïoh ka kyrdan kaba 8 ha ka clas XII Commerce bad kiwei pat bad kane ka dei ka dak jong ka jingkyrmen ïa ka lawei jong ngi ki khun samla.
