Shillong, Ïaïong 25: Da ka jingmut ban long ka nuksa ïa la ki khun kiba ieid ïa ka kam ïalehkai bad kumjuh ki samla ka thaiñ Mawmluh bad Jylla hi baroh kawei, ka Kong Darisuk Kharwanlang kaba la 48 snem ka rta bad don ruh 5 ngut ki khun ksiew, kan mih na nongbah Shillong ha ka 25 tarik u Ïaïong ban leit ïashim bynta ha ka lympung ïakob mareh (Athletics) ka ban sdang naduh ka 30 tarik u Ïaïong haduh ka 3 tarik u Jymmang, 2022 ha nongbah Delhi.
Kane ka lympung ba la tip kum ka 2nd Khelo Masters’ Games Foundation National Championship ka dei na ka bynta ki nongïalehkai kiba hapdeng ka rta 35-80 snem bad nalor ka Atheletics kin don ruh shibun ki jingïaleh kai kum ka Basketball, Football, Hockey, Kabaddi, Netball, Table Tennis bad kiwei kiwei pat.
Kane ka longkmie ka ïoh pdiang jingkyrshan ha kane ka jingleit ïalehkai jong ka na ki nongkitkam ka kynhun longkmie BJP Shella Mandal ha ka jingïalam ka Kong Arena Hynñiewta. Ha ka step 25 tarik shwa ba kan leit sha Delhi ka la ïoh pdiang jingkyrshan bad jingai mynsiem ruh na u Bah Sanbor Shullai, MLA ka BJP na South Shillong uba dei ruh u Myntri Sorkar kumjuh na kynhun ki longkmie BJP katei ka Constituency bad Meghalaya Unit.
Kane ka longkmie ka la ïoh rah dang shen ïa ka takma rupa na ka lympung ïakob mareh kaba la long ha Goa bad ha ka jingshisha ka la shah jied ban leit ïa aireng sha Malaysia hynrei kam shym la ïoh lad namar ka jingbym ïoh jingkyrshan. Ka la ïathuh ba ka la wan ïashim bynta bunsien ha ki lympung ïakob mareh ha nongbah Guwahati bad ha ka Jylla.
