Shillong, Rymphang 23: Dang shisnem eiei mynta ba ka Hynñiewtrep Achik National Movement ki la leit da ki spah ngut ban pynlong jingïakhih ha Jantar Mantar ha Nongbah Delhi ban dawa na ka bynta ki lai tylli ki mat jong ka jaitbynriew kum ka Inner Line Permit, ban pynrung ïa ka ktien Khasi ha ka khyrnit ba Phra jong ka riti synshar ka ri India bad ban pynbeit noh ïa u pud u sam hapdeng ka jylla Meghalaya bad ka Assam, mynta ka kynti kane ka seng kan leit biang ban dawa ïa kitei mat sha Delhi.
Ka jingthmu ka HANM ban leit hiar biang sha Delhi ka long ba haduh mynta ruh ka sorkar India ka dang sngap jar jar halor kine ki jingdawa, kumta sa shisien biang ki dkhot ka HANM kin leit ban pynlong jingïakhih ha nongbah Delhi ban pynkynmaw ïa ka sorkar India ba ka dei ban pynurlong noh ïa kine ki jingdawa.
Ka kynhun ba nyngkong ka ban ïalam da u President rangbah u Bah Lamphrang Kharbani kan mih ha ka 23 tarik u Rymphang 2025 bad ka kynhun kaba ar pat kan mih ha ka 24 tarik u Rymphang 2025.
Ha ka kyrwoh khubor ka seng ka ong ba ka jingïakhih ka HANM kan sdang ha ka 25 tarik mynta u bnai 2025. Ha kane ka sngi ki dkhot ki ban leit ïakhih sha Delhi kin dei na kylleng ka ri Khasi Jaiñtia kum ka dak ka jingai mynsiem da kaba pynher lama ha kylleng ki jaka kum ha Motphran bad sha kiwei pat ki jaka.
