Yn leit buddien u Myntri ka PHE sha baroh 12 ki district halor ka jingpyntrei ïa ka skhim JJM

Shillong, Jylliew 24: Na kadaw ba ka don ka jingujor na ki paidbah halor ka skhim JJM na ka liang u Myntri ka Tnat Public Health Engineeriong (PHE), u Marcuise N Marak, u la rai ban leit jurip sha baroh 12 tylli ki District ka Jylla na ka bynta ban shong bishar kam haba ïadei bad ka jingpyntreikam ïa ka Jal Jeevan Mission (JJM).
“Namar mynta ba la weng ïa ka Model Code of Conduct (MCC), ngan sa shong bishar kam halor ka jingpyntreikam ïa ka JJM hapoh ka Jylla. Ngan sa leit ïuhkjat ha baroh ki District ka Jylla ban pynthikna ba ka Tnat PHE ka la leh eiei halor ki jingujor kiba wan na u paidbah,” ong u Marak.
Ha kaba ïadei bad kane haba pynpaw ba ka JJM ka dei ka skhim ba dang ïaid, u Myntri ula ong ba kin don beit katto katne ki jingduna hangne hangtai. “Kumta, ha man ba don ki jingujor, ngin pyrshang ban khmih bad ban pynbeit ïa ki,” u la bynrap.
Katkum ka jingong u Myntri, 80 percent ka kam ka la dep bad palat 5.14 lak ki longïing kila ïoh kor um ïing ba mih um lyngba ka JJM ha Jylla Meghalaya.