Yn leit bud dien biang ka sorkar ïa ka ILP sha Delhi bad yn pynkhlaiñ ruh ban pyntreikam ïa ka MRSSA : Dy.CM

Shillong, Jylliew 11 : Ka sorkar jylla kan sa leit bud dien biang na ka sorkar pdeng na ka bynta ban pyntreikam noh kloi ïa ka Inner Line Permit (ILP) hapoh ka jylla bad ha kajuh ka por katba ym pat ïoh ïa ka ILP yn pynkhlaiñ bad pyrkhing bha ka jingpyntreikam ïa ka Meghalaya Resident Safety and Security Act (MRSSA) 2016 khnang ban pynthikna ba kito kiba wan rung sha ka jylla kin hap ban rejister beit ïa ki kyrteng jongki.
ïa kane ka rai ban leit bud dien ïa ka ILP la shim hadien ka jingjia jong ka jingshah pyniap jong uwei u nongwan jngohkai sha ka jylla ha la ka jong ka kurim u Raja Raghuvanshi. U Raja bad ka Sonam Raghuvanshi ki la wan sha kane ka jylla ha ka 22 tarik ban pynlut por ( honeymoon) tang arngut hadien ba ki la dep ïathoh ha ka 11 tarik Jymmang ha Indore, Madhya Pradesh. Hynrei tang ha ka 23 tarik ki la jah rngai bad ha ka 2 tarik la lap ïa ka metiap jongu Raja na Weisawdong. Hynrei ka jingwan shane ka long pynban ban shah pyniap ha la ka jong ka kurim da kaba ka la thong pisa ïa ki nongpyniap briew kiba na Madhya Pradesh bad UP hi da ka jingïasuh buit lang bad u samla jongka u Raj Kushwaha.
Kane ka jingjia ka la pynkhih win biang ban dawa pyntreikam ïa ka ILP hapoh ka jylla bad kumjuh ruh ban pynkhlaiñ ka jingpyntreikam ïa ka MRSSA.
Haba ïakren bad ki nongthoh khubor u Symbud Myntri Rangbah ka jylla u bah Prestone Tynsong u la kular ba ka sorkar kan leit bud dien biang ïa ka ILP na ka sorkar pdeng “ Nga thikna ba u Myntri Rangbah ka jylla u Conrad K Sangma un sa shim khia halor kane ka jingdawa ILP bad ngin sa ïaleit lang ban ïa kynduh ïa ki heh ka tnad Ministry of Home Affairs (MHA) khamtam hadien ba la jia kane ka jingjia” ong u Symbud Myntri Rangbah.
Ha kajuh pat ka por u bah Prestone ula ïathuh ba ka sorkar ka la rai ruh ban pynkhlaiñ ka jingpyntreikam ïa ka MRSSSA 2016 “ Namar ngi dang don bun ki lad ki lynti ban pynkhlaiñ ïa kane ka aiñ ruh da kaba wanrah ki jingpynkylla halor ki katto katne tylli ki kyndon” ong u bah Prestone.
Haba la kylli shuh shuh u Symbud Myntri Rangbah u la ong lada pyntreikam hok ïa ka MRSSA kan long kawei na ki aiñ kiba khlaiñ ban khanglad ïa kino kino ki briew kiba thmu ban wan pynbud nam sniew leh wan leh ïa ki kam sniew sha kane ka jylla.
“ Lada phi phai sha ka MRSSA ki la don lypa ki aiñ bad ki kyndon ha kaba ki trai ïing, ki trai hotel, ki trai homestay, ki trai jaka puta ki dei ban rejister mar mar ïa ki kyrteng jong ki briew kiba wan sah ha ki ïing ki jongki bad ki donkam ban bthah ïa kito ki briew ba ki donkam ban pyndap ïa ki kyrteng bad address bad ki sngi ba kin sah la ka long shisngi, arsngi, shitaiew, shibnai ne ter ter. Hadien kane dei ban pyntip sha ki Dorbar Shnong bad ki Dorbar Shnong sha ki Police Station bad nangta sha ka District Task Force (DTF) ba la khlieh da ki DC khnang ban pynkhlaiñ ka jingpyntreikam ïa ka MRSSA” ïathuh u Symbud Myntri Rangbah.
“ Kane ka dei ka kam ba dei ban leh hynrei teng teng ki briew jong ngi ki leh klet noh. Mynta dei tad haba la jia kane ka jingjia ba sngewsih ba ngi sa sngewthuh ba donkam ban shim khia ïa kane ka kam. Nga kwah ban ïathuh ïa phi ba ka sorkar hapoh kine ki khyndiat sngi kan sa ai ki jingbthah ryngkat ki Standard Operating Procedure (SOP) sha baroh ki trai ïing, trai jaka, trai homestay, tang hotel ne kino kino ki ïing sah kai shipor. Kumta lada ngi bud pyrkhing ïa ki SOP nga tip shai ba yn lah beit ban ïoh jingtip bniah ïa kino kino kiba wan rung shapoh ka jylla wat lada pyntreikam shwa da ka MRSSA ruh. Kumba long mynta ngi don shwa tang kane ka aiñ MRSSA bad ngi hap ban pynkhlaiñ bad pyrkhing bha ka jingpyntreikam ïa ka Ngin bthah ruh ïa ki DTF jong baroh ki district ba kin ïatrei lang bad baroh ki Dobar Shnong, ki trai ïing, trai homestay, trai hotel namar ki hap ban ïatrei lang bad ka sorkar. Da kaba ngi ïatrei lang ngi lah ban pynthikna ba ngin lah ban ïada ïalade ne tehlakam ïa kino kino ki riewsniew kiba wanrah shapoh ka jylla wat tang hapdeng ka 10-15 minit ruh ngi la lah beit ban tip shaphang jongki” ong biang u Symbud Myntri Rangbah.