Shillong, Jylliew 17 : Ka Jylla Meghalaya ka la ïatakhuh bad ki syrtap jingeh kiba bun ha ka jingim jong ki samla ka Jylla ba kynthup naduh ka jingpep skul shiteng por, ka jingïashongkha khynnah, jingarmet khynnah, ka jingduna ïohkam ki samla bad ka jingbun ki samla ba shu shong khlem kam nalor ka jingjyllei dih droks bad kiwei kiwei.
Ka World Bank haba ïohi ïa kane, kala mih shakhmat ban ïarap ïa ka Jylla Meghalaya ban saiñ dur ïa ka jingim jong ki samla naduh ba ki dang khie dang san, ka ban wanrah ïa shibun ki jingkylla kum ha ka jingshongkha ynda la dei ka rta, ka jingïohkhun ynda la biang ka rta, ka kamai ka kajih, ki ban wan lyngba ka jingpynlut kham bun ka por ha ka jingai jinghikai bad kiwei kiwei.
Kane ka project ka dei kaba la buh ban pynlut haduh $62.50 million ha kaba ka World Bank kan ai haduh $40 million. Kane ka project ka dang don hapoh ka jingïapynbeit.
“Kat kum ka khana samari 2011, ka jingdon ki samla ba dang khie dang san ha Meghalaya kala jan kot ïa ka 24 % na ka jingdon paid (kumba 710,000 ngut ki shynrang bad kynthei), ha kaba palat 80% ki dei kiba sah sha ki jaka nongkyndong bad 88% ki dei ki Scheduled Tribe” ong ka project document jong ka World Bank.
Ka World Bank ka pyntip ruh ba ka jingpep skul shiteng por ha ka kyrdan pule Upper Primary ha Meghalaya ka kot haduh 11% (12 ki shynrang, 9 ki kynthei), kaba long lai shah ïa ka national average, bad 22 % ha ka kyrdan pule Secondary (23 ki shynrang bad 20 ki kynthei), kaba jan kot ïa arshah ka national average.
“Ka jingiashongkha khynnah ka dei kaba jia ha man ki jaka ha Meghalaya ha kaba kumba 1 na ki 6 ngut ki samla kynthei ba dang khie dang san kila ïashongkha hashuwa ba kin kynjoh ïa ka 18 snem bad ka jingïohkhun khynnah ka kot haduh 7%” ong ka World Bank.
Ka project kan don ha ki saw bynta- (1) Learning Mission, Life Skills, and Career Preparation in Schools (2)Community Interventions and pathways for out-of-school adolescents (3) State Capability and Program Management bad ka (4) Contingent Emergency Response Component (CERC).
Ka bynta ba nyngkong kan kynthup ïa lai tylli ki kam : (a) ka Learning Mission ïa ki Upper Primary School, (b) Life Skill Education lyngba ki jingshim klas bad ka in-school adolescent club lem bad ka (c) academic counselling and career readiness ha ki secondary school.
Kane ka bynta ba nyngkong kan pynleit jingmut ha kaban pynkupbor da ka jingnang jingstad ïa ki samla ba dang khie dang san ha ki skul Upper Primary (grade 6-8), Secondary (grade 9-10) bad Higher Secondary (grade 11-12) ka Sorkar bad kiba ïarap ka Sorkar hapoh ka Jylla.
Ka bynta kaba ar kan pynleit jingmut ha ka ban pynjanai ïa ka jingpynkupbor da ka jingnang jingstad ïa ki samla ba dang khie dang san kiba khlem leit skul bad kumjuh ruh ïa ki Kmie ki Kpa jongki, ki Nongkitkam Shnong, ki Frontline Workers, ka ban pynleit jingmut kyrpang tang sha ki samla ba dang khie ki bym leit skul.
Ka bynta kaba lai kan pynleit jingmut halor ka jingpynkhlaiñ ïa ki jaka pule ha ka Jylla ba kin lah pynjanai ha ka jingtreikam, ban buh ïa ki youth centre kum ki block-level hub ïa ki samla ba dang khie bad ki samla lem bad kiwei kiwei.
Ka Bank ka pyntip ba ka Sorkar Meghalaya ka dang thaw mynta ïa ka buit treikam ban neh slem bha (long term) ha kaban pynkupbor da ka jingnang jingstad ïaki samla ba dang khie bad ki samla lyngba ki Policy bad ki prokram bapher bapher.
