Shillong, Jylliew 24 : Wat la ka kynhun Meghalaya Democratic Alliance (MDA) kan dang ïa kynduh ban shim rai halor ka election President jongka ri India, hynrei na ka liang ka National Peoples Party (NPP) ka la dep rai ban kyrshan beit ïa ka kyrtong mon lang ka NDA ka Droupadi Murmu.
Namar haba ïakren bad u President ka NPP hangne ha Meghalaya uba dei u MP Rajya Sabha u Dr Wanwei Roy Kharlukhi u la ong “ Ngi dei ka bynta jongka NDA kumta ngin kyrshan ïa ka kyrtong mon lang ka NDA”. Nalor kane ula ïaroh ruh ïa ka NDA hapoh ka jingïalamka BJP kaba la jied ïa ka Droupadi kum ka kyrtong President kaba dei ka longkmie jaidbynriew riewlum ba nyngkong eh ban sa ïoh kiew ha katei ka shuki.
U Dr Kharlukhi ula ong “ Kane ka dei ka jingthrang bad jingpohsniew kaba la slem jong u nongseng ka NPP u (L) P.A Sangma ba ki paid riewlum ki dei ban ïoh kiew ha ka shuki President ka ri.
“ Kumta ngi sngewkmen shi katdei eh ba ha ka sien ba nyngkong ha ka jingrakhe ïaka jingdap 75 snem ka jinglaitluid ka ri India ba ngin sa ïoh President ruh da ka rewlum kaba long ka jingpohsniew kaba la slem bah jong u nongseng jongka NPP” ong u Dr Kharlukhi.
U la ong ki jaidbynriew riewlum kim don jingiapher na kiwei ki jaidbynriew jongka ri. U Dr Kharlukhi un iashim bynta ha ka jingiathep vote bad ki MLA nangne na ka jylla hi. Ka jngthep vote kan long ha ka 18 tarik Naitung bad ka jingniew vote pat ha ka 21 tarik Naitung.
