Yn kyrshan ka MDA ïa ka kyrtong President ka NDA tangba yn lum shwa u CM ïa ka jingïalang

Shillong, Jylliew 22 : Kat kum ka tyllong khubor ba la ïoh la ïathuh, wat la ka sorkar Meghalaya Democratic Alliance (MDA) kam pat shim rai ïano yn kyrshan ha kane ka election jied President jongka ri, hynrei ka sur hi ka lam ba ka MDA hi kan ai jingkyrshan ïa ka kyrtong jongka BJP kaba ïalam ïa ka sorkar NDA, ka Droupadi Murmu namar kan long ka kynthei riewlum kaba nyngkong duh eh ban ïoh kiew sha katei ka shuki.
Na ka liang u Myntri Rangbah u Conrad K Sangma ula pyrshang ban twad jingmut na baroh ki nongïalam kiba synrop lang ha kane ka sorkar MDA kynthup ïa ki 5 ngut ki MLA ka Congress kiba shah sospon bad ai jingkyrshan ïa kane ka sorkar khnang ban tip ïano ki sngew dei ban ai ka jingkyrshan ha kane ka jingjied Presdient jongka ri.
“ U Myntri Rangbah un sa lum shen ïa ka jingïalang jongka MDA kata u tang shu wan phai na ri lum Garo ban ïakren halor kane ka kam khnang ban ïashim rai lang da kawei ka jingmut ïano ba yn kyrshan ha kane ka kynti” ong uwei u Nongïalam u bym kwah ban pynpaw kyrteng ïalade.
“ Ha ka jingshisha u Myntri Rangbah ula dep pynpaw hi da lade balei ba u kwah ban kyrshan ïaka Murmu ka daw ka long ba ka dei ka jaidbynriew Riewlum bad kan long ka jingsarong ïa ki paid riewlum ban ïoh shong ha katei ka shuki President da ka kynthei riewlum kaba dei ruh ka sien ba nyngkong eh ban ïoh kiew ïa katei ka khet da ki jaidbynriew riewlum.
Haba thoh ha ka Twitter u Myntri Rangbah ula ai ka jingïaroh ïa u Myntri Rangbah duh ka ri u Narendra Modi uba la rai ban jied ka ka kynthei riewlum ban ïakhun ïa katei ka shuki President jongka ri. “ Kane ka long ka jingphohsniew kaba la slem bah jong I Pa jong nga U (L)P.A Sangma bad kaba la urlong mynta ka kynti” ong u Myntri Rangbah.
Ha ka jingshisha u P.A Sangma u dei u jaidbynriew riewlum uba nyngkong eh ban ïakhun ïa katei ka shuki President bad uba la ai jingkyrshan da ka BJP hynrei ula liem noh ha u Pranab Mukherjee namar ha kato ka por ïa ka sorkar ha Delhi la ïalam da ka Congress.
Ki san ngut ki MLA ka Congress ruh kin ai jingkyrshan ïaka Murmu hi. Namar I Kong Ampareen Lyngdoh MLA ka Laitumkhrah i la ong “ Ha kaba nyngkong ngi la mut ban ym ïashim bynta namar ba ngi shah sospon hynrei hadien ba u Myntri Rangbah duh u pynbna da ka Murmu ngi la rai ban ai ka jingkyrshan ïaka namar ka dei ka jaidbynriew Riewlum kaba nyngkong eh ban kiew ïa katei ka shuki President. “ Na la rai ban ai ka jingkyrshan ïa ka Murmu” ong i kong Ampareen.
I Kong Ampareen i la ai ka jingïaroh ruh ïaka BJP kaba la jied ia ka kynthei riewlum kaba nyngkong ban leit sah ha Raisina Hills.I la ïathuh ba ila iakren ruh bad u Myntri Rangbah bad pynpaw ïano in ai ka jingkyrshan.
U Chief Electoral Officer u bah F.R Kharkongor u la ïathuh ba ka shi vote jong u MLA ha kane ka jylla ka ïa ryngkat 17 vote bad baroh na kane ka jylla kan long 1020 votes.
Ka samoi jong une une u President ba mynta u Ram Nath Kovind kan kut ha ka 24 tarik Naitung 2022 kumta hap ban jied bad pynskhem da u ne ka ba thymmai shwa ban kut katei ka samoi. Ka jingjied President kan long 18 tarik Naitung bad ka jingniew vote kan long 21 tarik Naitung 2022.
Ka Droupadi Murmu kaba 64 snem ka rta ka dei na ka jylla Odisha bad ka dei ka Lat ba rim jongka Jharkhand naduh u 2015-2021. Ka dei ka dkhot ba pura ka BJP bad ka la ju long ruh kum ka MLA jongka Odisha Assembly naduh 2000-2009.